पाळधी, धरणगाव ( प्रतिनिधी ) – येथील मुख्य रस्त्यावर असलेल्या वृद्ध दुकानदाराने गाडी रस्त्यावर लाऊ नको, असे सांगितले. त्याचा राग आल्याने त्यांच्या दुकानात शिरुन वृद्ध दुकानदारास मारहाण केल्याची घटना घडल्याने खळबळ उडाली आहे. दरम्यान, ही घटना त्या दुकानात असलेल्या सीसीटीव्हि कॅमेऱ्यामध्ये कैद झाली आहे.
पाळधी येथे आज सकाळी ११ वाजेच्या सुमारास एका वाहन चालकाला वृद्ध दुकानदाराने वाहन लावताना हटकले. त्यानंतर त्याने त्यांच्याच दुकानात शिरुन रागाच्या भरात वृद्ध दुकानदाराला मारहाण केली. त्या दुकानात असलेल्या सीसीटीव्हि कॅमेऱ्यात ही पूर्ण घटना कैद झाली आहे. या वेळी परिसरातील नागरिकांनी दुकानात धाव घेऊन त्या वृद्ध दुकानदाराला त्या व्यक्तीच्या तावडीतून सोडवले. तरी तो त्या दुकानदारांना ठार मारण्याची धमकी देत होता. यामुळे त्या दुकानदाराने पाळधी पोलिसांत धाव घेतली. मात्र, नेहमीप्रमाणे तेथे जमाव जमला अन् जाऊ द्या, त्याची चूक झाली, असे सांगत या प्रकरणावर पडदा पाडण्याचे प्रयत्न झालेत. पाळधी येथे घडणाऱ्या अशा घटना नित्याच्याच असून कोणतीच कारवाई होत नसल्याने कोणीही येते व दादागिरी करून जाते, अशी स्थिती आहे. दरम्यान, पाळधी येथील मुख्य रस्त्यावर कुणीही आपले वाहन कोठेही लाऊन इतरत्र निघून जातात. यामुळे मुख्य मार्गावर नेहमीच वाहतुकीची कोंडी होते. याच कारणामुळे पाळधी बस स्थानकावर लांब पल्ल्याचा गाड्या येत नाहीत. कारण, वाहतूक कोंडीमुळे अनेक बस चालकांना या ठिकाणी मार खावा लागला असून बऱ्याच वेळा तू-तू मैं-मैं होत असते. त्यामुळे प्रवाशांनाही त्रास होतो व त्यांचाही वेळ वाया जातो. याचाच अनुभव येथे वास्तव्यास असलेल्या बस चालकांना ही आला आहे. याबाबत पाळधी पोलिसांनी कारवाई करण्याचा प्रयत्न केला होता. मात्र, त्यालाही मध्येच खीळ लागली. या रस्त्यावर आधीच दुभाजक (डिव्हाडर) असल्याने वाहतुकीची कोंडी होते. त्यामुळे कोणत्याही दुकानदाराने हटकले, तरी त्यालाच त्याचा त्रास होतो. त्यामुळे कुणीही काहीच बोलत नाहीत. मात्र, वाहतुकीची कोंडी झाली की सर्व त्या दुकानदाराला बोलतात. वास्तविक यात त्यांची काहीच चूक नसते.
