वर्धा (वृत्तसंस्था) वर्धा जिल्ह्यातील नवीन आष्टी येथील एका महिलेनं आपला प्रियकर आणि त्याच्या मित्राच्या मदतीने आपल्या पतीची निर्घृण हत्या (wife killed husband with the help of boyfriend) केली आहे. यानंतर त्यांनी मृतदेह एका पोत्यात टाकून घरापासून ५० मीटर अंतरावर नेऊन फेकला आहे. या प्रकरणी पोलिसांनी मृताच्या पत्नीसह तिच्या प्रियकराला आणि अन्य एका साथीदाराला अटक (3 Accused arrested) केली आहे.
जगदीश भानुदास देशमुख असं हत्या झालेल्या ३८ वर्षीय पतीचं नाव असून तो नवीन आष्टी येथील रहिवासी होता. या प्रकरणी पोलिसांनी पत्नी दीपाली देशमुख (वय ३२), प्रियकर शुभम जाधव (वय २२), साथीदार विजय माने (वय २१) अशा तीन जणांना अटक केली आहे. मिळालेल्या माहितीनुसार, मृत जगदीश हा गवंडी कामगार होता. त्यांचा विवाह दीपालीसोबत झाला होता. या दाम्पत्याला पाच वर्षांची मुलगी आणि तीन वर्षांचा मुलगा देखील आहे. सर्व काही सुरळीत सुरू होते. पण अलीकडेच जगदीशला दारुचं व्यसन झडलं होतं.
दारू प्यायल्यानंतर जगदीश आणि दीपाली यांच्यात अनेकदा खटके उडायचे. या कारणातून जगदीशच्या त्रासाला कंटाळून दीपाली माहेरी निघून गेली होती. काही दिवसांपूर्वी ती पुन्हा नांदायला आली होती. पण यावेळी ती आपल्या पतीपासून वेगळं राहत होती. दरम्यान तिचं आपल्या वयापेक्षा १० वर्षांनी लहान असणाऱ्या शुभमसोबत प्रेमसंबंध जुळले. गेल्या काही काळापासून त्यांचे अनैतिक संबंध सुरू होते. पण जगदीशला याबाबत कळाल्यानंतर दोघांमध्ये पुन्हा वाद झाला.
यातूनच आरोपी दीपालीने आपल्या पतीच्या हत्येचा कट रचला. तिने गुरुवारी रात्री एक ते दीडच्या सुमारास प्रियकर शुभम आणि त्याचा मित्र विजय यांच्या मदतीने जगदीशला बेदम मारहाण केली. आरोपींनी जगदीशच्या डोक्यात सेंट्रिंगच्या पाटीने जबरी वार केले. तसेच धारदार शस्त्रानं त्यांची हत्या केली. यानंतर आरोपींनी मृतदेह पोत्यात भरून रस्त्याच्या कडेला फेकला. ही घटना उघडकीस आल्यानंतर पोलिसांनी मृत जगदीशच्या आईनं दिलेल्या फिर्यादीनुसार गुन्हा दाखल केला. या प्रकरणी तपास सुरू असताना पोलिसांना मृताच्या पत्नीवर संशय बळावला. यानंतर पोलिसांनी अधिक तपास केला असता या हत्येचा उलगडा झाला आहे. या घटनेचा पुढील तपास पोलीस करत आहेत.
