वरणगाव ता. भुसावळ (प्रतिनिधी) येथील वरणगाव ऑर्डनन्स (आयुध निर्माणी) फॅक्टरीत रविवारी रात्री ८:३० वाजण्याच्या सुमारास पावडरचा स्फोट होऊन दोन कामगार जखमी झाले. प्रशांत पाटील (रा. तळवेल) आणि चेतन पाटील अशी जखमी कामगारांची नावे आहेत. दरम्यान, या घटनेच्या चौकशीचे आदेश देण्यात आले आहेत.
वरणगाव आयुध निर्माणीचे पीआरओ महेश शिंदे यांनी प्रसिद्धी पत्रकाद्वारे दिलेल्या माहितीनुसार, फॅक्टरीमधील असेंब्ली सेक्शनमध्ये पावडरचा स्फोट झाला. यात प्रशांत याच्या डाव्या हाताला गंभीर दुखापत झाली असून, त्याला बऱ्हाणपूर येथे तर चेतन याला भुसावळ येथील खासगी रुग्णालयात दाखल करण्यात आले आहे.
आयुध निर्माणीचे महाप्रबंधक अजयकुमार सिंग, सुरक्षा अधिकारी एस. आर. पाटील व अन्य अधिकाऱ्यांनी जखमींची दवाखान्यात जाऊन भेट घेतली. स्फोटाचे नेमके कारण अद्याप स्पष्ट झालेले नाही. संबंधित जखमी कामगारांना प्रशासनातर्फे योग्य ती मदत दिली जाणार असल्याचे फॅक्टरी प्रशासनाने कळविले आहे. दरम्यान, नेमका अपघात कसा घडला? हे अद्याप स्पष्ट झालेले नाही. संपूर्ण चौकशीअंती ते समोर येईल.
