मुंबई (वृत्तसंस्था) विधान परिषदेचे विरोधी पक्षनेते प्रवीण दरेकर यांच्याविरोधात मुंबईत फसवणुकीचा गुन्हा दाखल करण्यात आला आहे. या प्रकरणावरुन विरोधी पक्ष भाजपने आक्रमक पवित्रा घेतलाय. विरोधी पक्षाच्या नेत्यांवर सरकारकडून केल्या जात असलेल्या कारवाईला घाबरत नसल्याचं विरोधी पक्षनेते देवेंद्र फडणवीस यावेळी म्हणाले. लोकशाही पायदळी तुडवण्याचं काम सरकारकडून होत आहे. जो खड्डा खणतो, तोच त्या खड्ड्यात पडतो”, असं फडणवीस म्हणाले.
विधानसभेचे विरोधी पक्षनेते देवेंद्र फडणवीस यांनी म्हटलं, या संदर्भातील फॉलोअप मुख्यमंत्र्यांचं कार्यालय करत होतं अशी माहिती आमच्याकडे आहे. मी कालच सांगितलं होतं की, नवीन पोलीस आयुक्त संजय पांडे हे आल्यानंतर रोज सत्तापक्षाच्या वतीने सांगण्यात यंतंय आम्ही सहा-सात जणांची यादी संजय पांडे यांच्याकडे दिली आहे. त्यात पहिलं नाव प्रवीण दरेकर यांचं आहे. ते आम्हाला आज प्रत्यक्षात लक्षात आलं आहे. आम्ही याला घाबरत नाही. आमच्यावर कितीही गुन्हे दाखल झाले… आम्ही न्यायालयात जावू, आंदोलन करु, जनतेच्या दरबारात जावू पण भ्रष्टाचाराच्या विरोधात बोलण आम्ही बंद करणार नाही. मला कल्पना आहे की, अनेक खोटे गुन्हे दाखल होतील. पण लोकशाही पायदळी तुडवण्याचं काम या सरकारकडून सुरू आहे. मी या सरकारला इतकंच सांगू इच्छितो की, जो खड्डा खोदतो तोच त्या खड्ड्यात पडतो हे त्यांनी लक्षात ठेवावं असंही देवेंद्र फडणवीस म्हणाले आहेत.
प्रवीण दरेकरांवर गुन्हा दाखल होताच अटकेची मागणी
प्रवीण दरेकर यांच्यावर गुन्हा दाखल होताच शिवसेनेने त्यांना अटक करण्याची मागणी केली आहे. शिवसेनेच्या आमदार मनिषा कायंदे यांनी म्हटलं, जर विरोधी पक्षनेत्यावर एफआयआर दाखल झाला असेल तर त्यांना या सभागृहात येण्याचा नैतिक अधिकार नाहीये. त्यांना या पदावरदेखील राहण्याचा नैतिक अधिकार नाहीये. त्यामुळे प्रवीण दरेकर यांचा भाजपने राजीनामा घेतला पाहिजे. आज आम्ही महाविकास आघाडी सरकारमधील विधानपरिषदेतील सर्व आमदारांनी मागणी केली की त्यांना अटक केली जावी.
