जळगाव प्रतिनिधी । शेतातील विद्यूत मोटार सुरू करत असतांना विजेचा जोरदार शॉक लागून ४२ वर्षीय व्यक्तीचा जागीच मृत्यू झाला. ही घटना शुक्रवार २ ऑगस्ट रोजी सकाळी १० वाजेच्या सुमारास जळगाव तालुक्यातील उमाळा शिवारातील त्यांच्या शेतात घडली. याप्रकरणी एमआयडीसी पोलिसात अकस्मात मृत्यूची नोंद करण्यात आली आहे. (संजय बापू पाटील वय ४२, रा. धानवड, ता. जळगाव) असे मयत झालेल्या शेतकऱ्याचे नाव आहे.
जळगाव तालुक्यातील धानवड येथील शेतकरी संजय पाटील हे आपल्या कुटुंबियांसह वास्तव्यास होते. त्यांचे उमाळा शिवारात शेत असून त्यांच्या शेतात पावसाचे पाणी साचलेले होते. शुक्रवारी २ ऑगस्ट रोजी सकाळी १० वाजता संजय पाटील हे पत्नी, वहिनी व पुतणीसह शेतात साचलेले पाणी काढण्यासाठी गेले होते. शेतातील विहरीजवळ लावलेली मोटार सुरु करण्यासाठी संजय पाटील हे त्याठिकाणी गेले असता, त्यांना विजेचा जोरदार शॉक लागून ते शेतात कोसळले आणि त्यांचा जागीच मृत्यू झाला.
शेतात काम करणाऱ्या त्यांच्या कुटुंबियांना संजय पाटील यांना शॉक लागल्याचे दिसताच त्यांनी लागलीच त्याठिकाणी धाव घेतली. दरम्यान, शेतातील मजूरांच्या मदतीने त्यांना लागलीच जिल्हा शासकीय वैद्यकीय महाविद्यालय व रुग्णालयात दाखल केले. याठिकाणी वैद्यकीय अधिकाऱ्यांनी त्यांची तपासणी करीत मयत घोषीत केले. यावेळी नातेवाईकांनी एकच आक्रोश केला. याप्रकरणी एमआयडीसी पोलिसात अकस्मात मृत्यूची नोंद करण्यात आली आहे.
