भुसावळ प्रतिनिधी : शहरातील हुडको कॉलनी परिसरात भरदिवसा झालेल्या घरफोडीच्या धाडसी घटनेने खळबळ उडाली आहे. चोरट्यांनी मुख्याध्यापकांच्या बंद घरावर डल्ला मारत सुमारे १५ लाखांचे १० तोळे सोन्याचे दागिने लंपास केले. अवघ्या दोन तासांत चोरट्यांनी आपला डाव साधल्याने नागरिकांमध्ये भीती पसरली आहे.
याबाबत अधिक माहिती अशी की, मिरची ग्राऊंड परिसरातील हुडको कॉलनीत महाराणा प्रताप विद्यालयाचे मुख्याध्यापक सुरेश शिंदे राहतात. कुटुंबीय बाहेरगावी गेल्याने ते घरी एकटेच होते. ३१ मे रोजी सकाळी सुमारे ११.३० वाजता ते कटींग व दाढीसाठी घराबाहेर पडले. घराच्या गेटसह मुख्य दरवाजाला कुलूप लावून ते गेले बाहेर होते. याच संधीचा फायदा घेत अज्ञात चोरट्यांनी वर्दळ कमी असलेल्या परिसरातील या घराचे कुलूप तोडून घरात प्रवेश केला. त्यानंतर घरातील कपाटांची झडती घेत सुमारे १० तोळे सोन्याचे दागिने चोरून नेले. दुपारी सुमारे १.३० वाजता शिंदे घरी परतल्यानंतर घरफोडीचा प्रकार उघडकीस आला. भरदिवसा झालेल्या या धाडसी चोरीमुळे परिसरातील नागरिकांमध्ये भीतीचे वातावरण निर्माण झाले असून शहरातील वाढत्या चोऱ्या आणि घरफोड्यांबाबत चिंता व्यक्त केली जात आहे. तर घटनेची माहिती मिळताच बाजारपेठ पोलीस ठाण्याचे हवालदार विजय नेरकर, चंद्रकांत रायपूरकर, दिलीप कोल्हे, जावेद शहा यांच्यासह पथकाने घटनास्थळी धाव घेत पाहणी केली. परिसरातील सीसीटीव्ही फुटेजच्या आधारे संशयितांचा शोध सुरू असल्याचे पोलिसांनी सांगितले. या घरफोडीमुळे शहरातील सुरक्षा व्यवस्थेचा प्रश्न पुन्हा ऐरणीवर आला असून चोरट्यांचा बंदोबस्त करण्याची मागणी नागरिकांकडून होत आहे.
