धरणगाव (प्रतिनिधी) – तालुक्यातील एका गावातील अवघ्या ५ वर्षे ७महिन्यांच्या चिमुरडीचा विनयभंग केल्याची संतापजनक घटना १ जून रोजी दुपारी घडली. याप्रकरणी पीडित बालिकेच्या आईने दिलेल्या फिर्यादीवरून धरणगाव पोलीस ठाण्यात संशयिताविरुद्ध पोक्सोसह अॅट्रॉसिटी अंतर्गत गुन्हा दाखल करण्यात आला आहे. पोलिसांनी संशयिताला तत्काळ ताब्यात घेतले आहे.
पीडित बालिकेची आई व त्यांचे पती हातमजुरी करून कुटुंबाचा उदरनिर्वाह करतात. सोमवारी दुपारी १ वाजेच्या सुमारास त्यांच्या शेजारी राहणारी एक महिला त्यांच्या घरी कैरी मागण्यासाठी आली होती. ती महिला परत जात असताना तिच्यासोबत पीडित चिमुरडी खेळत खेळत शेजाऱ्यांच्या घरी गेली. काही वेळाने ती महिला पीडितेच्या आईकडे गप्पा मारण्यासाठी आली. मात्र, तिच्यासोबत मुलगी न आल्याने आईने मुलीचा शोध सुरू केला. मुलगी शेजाऱ्यांच्या घरात असल्याचे समजताच आई तिला आणण्यासाठी गेली. त्यावेळी घराच्या दरवाजातून तिला मुलीच्या रडण्याचा मोठा आवाज आला. आईने आत पाहिले असता, घरातील संशयित तरुण चिमुरडीचा विनयभंग करत असल्याचे त्यांच्या निदर्शनास आले. हा धक्कादायक प्रकार पाहताच दिव्यांग आईने तत्काळ घरात धाव घेत मुलीला संशयिताच्या तावडीतून सोडवले आणि आरडाओरड केली. त्यानंतर ग्रामस्थांनी तातडीने पोलीस पाटील आणि सरपंचांना घटनेची माहिती दिली. घटनेचे गांभीर्य ओळखून धरणगाव पोलिसांचे पथक तत्काळ गावात दाखल झाले. पोलिसांनी संशयिताला ताब्यात घेतले. या प्रकरणाचा तपास धरणगाव पोलीस करत आहेत.
