अमळनेर (प्रतिनिधी) – तालुक्यातील एकतास येथे किरकोळ वादातून एकाने वयोवृद्ध व्यक्ती व त्याच्या मुलाला शेतात मारहाण केल्याची घटना घडली आहे. या प्रकरणी मारवड पोलीस ठाण्यात गुन्हा दाखल करण्यात आला आहे.
एकतास येथील भरत विक्रम पाटील यांनी दिलेल्या फिर्यादीनुसार, ११ रोजी भरत पाटील व त्याचे वडिल विक्रम दामूपाटील हे सकाळी १० वाजेच्या सुमारास एकलहरे शिवारातील शेतात कापसाच्या पिकाला पाणी भरण्यासाठी गेले होते. तर गावातील सुनील हंसराज पाटील यांचे शेत त्यांच्या बांधाला लागून आहे. त्यांच्या शेतात जेसीबी मशिन काम करत होते. दुपारी १२.३० वाजेच्या सुमारास गावातील सुभाष निंबा वाडिले हा भरत पाटील यांच्या शेतात आला. त्यानंतर सुनील पाटील यांना भरतच्या वडिलांकडे हात दाखवत म्हणाला की, याचे जेसीबी शेतात कामाला लावायला हवे होते. विक्रम पाटील यांनी त्याला तु अस का बोलतोय, याच्यापुढे अस बोलू नको, असे सांगितले. त्यानंतर सुभाष तेथून निघुन गेला. त्यानंतर काही वेळाने तो परत आला व विक्रम पाटील यांना शिविगाळ करुन मारहाण करु लागला. त्यावेळी भरत पाटील पळत आला. तेव्हा सुभाष वाडिले याने भरतलाही मारहाण करुन शिविगाळ केली. तसेच दगड डोक्यास मारला. तसेच विक्रम पाटलांना विहिरीत टाकुन देईल, अशी धमकी देत शिविगाळ केली. यानंतर जखमी भरत पाटील यास बेटावद ग्रामीण रुग्णालयात उपचारासाठी दाखल केले. याप्रकरणी मारवड पोलीस स्टेशनला सुभाष वाडिले यांच्याविरुध्द गुन्हा दाखल करण्यात आला आहे. तपास पो.हे.कॉ. मुकेश साळुंखे करत आहेत.
