भंडारदरा (वृत्तसंस्था) भंडारदरा पर्यटन सफरीसाठी आलेल्या तरुणाचा रंधा धबधब्यामध्ये पडून मृत्यू झाल्याची दुर्दैवी घटना शनिवारी दुपारी घडली. याप्रकरणी राजूर पोलीस ठाण्यात घटनेची नोंद करण्यात आली आहे.
श्रीरामपूर तालुक्यातील दत्तनगर येथील सुमित बाबासाहेब वाघमारे (वय २१) हा तरुण आपल्या चुलतभाऊ व शिर्डीच्या अन्य मित्रांसह भंडारदरा पर्यटन स्थळावरील रंधा धबधब्याच्या परिसरात पर्यटनासाठी आला होता. आपल्या मित्रांसमवेत रंधा धबधबा बघत असताना फोनवर बोलण्याच्या नादात त्याचा घसरुन तो पाय नदीत पडला व तसाच रंधा धबधब्यातुन वाहत गेला. यामध्ये त्याचा दुर्दैवी अंत झाला.
राजुर पोलीस ठाण्यात याबाबत माहिती मिळताच तात्काळ पोलीस स्टेशनचे कर्मचारी दिलीप डगळे, अशोक काळे व प्रकाश लांडगे यांनी घटनास्थळ गाठत सुमितचा मृतदेह शोधण्याचा प्रयत्न केला. त्यासाठी स्थानिकांचीही मदत घेण्यात आली. रंधा धबधब्याच्या कोसळत्या पाण्याचाही अडथळा येत होता. गळाच्या सहाय्यानेही तपासकार्य सुरू ठेवण्यात आले होते. रात्री ९ वाजता सुमितचा मृतदेह रंधा धबधब्याच्या डोहामध्ये आढळुन आला.
