नशिराबाद (प्रतिनिधी) महिलांना पाहून शिट्ट्या वाजविण्यासह इतर किरकोळ वादातून नशिराबादमध्ये दोन गटात तुंबळ हाणामारी झाली. या प्रकरणी परस्पर विरोधी तक्रारी देण्यात आल्या असून ८ जणांविरुद्ध गुन्हा करण्यात आला आहे.
यासंदर्भात पहिल्या फिर्यादीत अफझलखान फरीदखान (वय १८ रा. हेडकर अली मोहल्ला नशिराबाद) यांनी दिलेल्या फिर्यादीनुसार, दि. १४ जून २०२२ रोजी नशिराबाद बस स्टँडच्या पुढे रोडवर फजल खान व त्याचा चुलत भाऊ दानिश खान रईस खान असे घराकडे जात होते. यावेळी रोडवर उभे असलेले रुपेश माळी, वासू माळी, विनोद माळी, गणेश माळी (सर्व रा. नशिराबाद) अशांना फजल खान याने महिलांना पाहून शिट्ट्या का मारताय ? याचा जाब विचारला. या कारणावरून फजल खानला चापटा बुक्क्यांनी लाथाबुक्क्यांनी मारहाण करून शिवीगाळ केली. तसेच दगडफेक करून अफझलखान व त्याच्या चुलत भावाचे डोके फोडत फजल खान याला जीवे ठार मारण्याची धमकी दिली. या प्रकरणी नशिराबाद पोलीस स्थानकात चौघांविरुद्ध गुन्हा दाखल करण्यात आला असून पुढील तपास पोलीस उपनिरीक्षक राजेंद्र साळुंके हे करीत आहेत.
यासंदर्भात दुसऱ्या फिर्यादीत सतीश कडू महाजन (वय ४७ रा. महाजन वाडा वरची अळी नशिराबाद) यांनी म्हटले आहे की, दिनांक १४ जून २०२२ रोजी दुपारी १.३० वाजेच्या सुमारास त्यांचा पुतण्या गौरव विनोद महाजन हा त्याच्या मित्रांसह दत्त मंदिराजवळ रस्त्यावर पोलो खेळत होता. यावेळी बॉल जटागिर महाराज मंदिराजवळ बसलेल्या दानिश खान रईस खान याच्याजवळ गेल्याचा त्याला राग आला. यानंतर दानिश खान रईस खान, फजल खान फरीद खान, मोहम्मद रिक्षावाला शाहिस्ता बी आसिफ खान (सर्व रा. नशिराबाद) यांनी गौरव महाजन व लकी महाजन यांना शिवीगाळ करून चापटा बुक्क्यांनी मारहाण करून विटा दगड फेकून मारून जखमी केले. या प्रकरणी नशिराबाद पोलीस स्थानकात चौघांविरुद्ध गुन्हा दाखल करण्यात आला आहे.
