नवी दिल्ली (वृत्तसंस्था) माजी पंतप्रधान डॉ. मनमोहन सिंह यांची प्रकृत्ती सध्या ठीक असल्याची माहिती समोर आली आहे. त्यांना एम्स हॉस्पिटलमधून डिस्चार्ज देण्यात आला आहे. ताप आल्याने आणि प्रकृत्ती अस्वस्थ वाटत असल्याने डॉ. मनमोहन सिंह यांना १३ ऑक्टोंबरला एम्समध्ये दाखल करण्यात आलं होतं.
माजी पंतप्रधान मनमोहन सिंग यांना आज दुपारी रुग्णालयात घरी सोडण्यात आलं. छातीत दुखत असल्याच्या तक्रारीनंतर ते एम्स रुग्णालयात दाखल झाले होते. डॉ. नितीश नायक यांच्या देखरेखीखाली त्यांच्यावर उपचार सुरू होते. नव्या औषधांची रिअॅक्शन झाल्याने मनमोहन सिंग यांची प्रकृती बिघडली असल्याचं सांगण्यात आलं होतं. पंरतु आज डॉक्टरांच्या परवानगीनंतर त्यांना आज घरी सोडण्यात आलं.
केंद्रीय आरोग्य मंत्री मनसुख मांडविया यांनी काही दिवसांपूर्वी डॉ. मनमोहन सिंह यांची भेट घेऊन त्यांच्या प्रकृतीची विचारपूस केली होती. त्या दरम्यान काढलेला एक फोटो त्यांनी सोशल मीडियावर शेअर केला होता. त्यावरुन मोठा वाद निर्माण झाला होता. डॉ. मनमोहन सिंह यांची मुलगी दमन सिंह यांनी मांडवीया यांच्यावर टीका केली होती. काही दिवसांपूर्वी डॉ. मनमोहन सिंह यांची प्रकृत्ती खालावल्याची तसेच त्यांच्या निधनाची अफवा सोशल मीडियावर पसरली होती.
मनमोहन सिंह यांना या वर्षी कोरोना विषाणूची लागण झाली होती. कोरोना पॉझिटिव्ह आल्यानंतर त्यांना १९ एप्रिल रोजी एम्सच्या ट्रॉमा सेंटरमध्ये दाखल करण्यात आलं होतं. त्यानंतर २९ एप्रिल रोजी त्यांना एम्सच्या ट्रॉमा सेंटरमधून डिस्चार्ज देण्यात आलं. माजी पंतप्रधानांनी ४ मार्च आणि ३ एप्रिल रोजी कोरोना लसीचे दोन डोस घेतले होते.
