वरणगाव, ता. भुसावळ (प्रतिनिधी) : येथून जवळच असलेल्या एका गावातील १३ वर्ष ९ महिन्यांच्या अल्पवयीन मुलीवर लैंगिक अत्याचार केल्याच्या आरोपावरून वरणगाव पोलीस ठाण्यात पाच जणांविरुद्ध गुन्हा दाखल करण्यात आला आहे. यातील चार संशयित आरोपींना गुरुवारी भुसावळ न्यायालयात हजर केले असता न्यायालयाने त्यांना तीन दिवसांची पोलीस कोठडी सुनावली. तर १५ वर्षीय विधिसंघर्षग्रस्त बालकाची जळगाव येथील बालसुधारगृहात रवानगी करण्यात आली आहे. या संदर्भात पीडित मुलीच्या ४७ वर्षीय वडिलांनी दिलेल्या फिर्यादीवरून १२ ऑगस्टला रात्री ७.१६ वाजता वरणगाव पोलीस ठाण्यात आरोपींनी गुन्हा दाखल करण्यात आला आहे.
या संदर्भात दिलेल्या फिर्यादीनुसार, मुलीच्या अज्ञानाचा लाभ घेत तिला खाऊसाठी पैसे देण्याचे आमिष दाखवले. त्यानंतर गावातील वेगवेगळ्या ठिकाणी नेले अन् तेथेच तिच्यावर वेळोवेळी लैंगिक अत्याचार केल्याचा आरोप करण्यात आला आहे. फिर्यादीत आरोपींनी वेगवेगळ्या कालावधीत विविध ठिकाणी अत्याचार केल्याचे नमूद करण्यात आले आहे. यामध्ये गुरांचा गोठा, राहत्या घराजवळील परिसर तसेच शेळ्यांचा वाडा अशा ठिकाणांचा उल्लेख आहे. या प्रकरणी मनोहर रामा पाटील, १५ वर्षीय विधिसंघर्षग्रस्त बालक, मधुकर विश्वनाथ भांरबे, नारायण सोमा चौधरी आणि विनायक वसंत पाटील यांच्याविरुद्ध कारवाई करण्यात आली आहे. तर भारतीय न्याय संहिता २०२३मधील कलम ६५(१) तसेच पोक्सो अधिनियम २०१२ मधील कलम ४ व ६ अन्वये गुन्हा दाखल करण्यात आला आहे. चार आरोपींना पोलीस कोठडी मिळाल्यानंतर पोलिसांकडून पुढील तपासाला गती देण्यात आली आहे. या प्रकरणाचा तपास वरणगाव पोलीस ठाण्याचे स.पो.नि. अमितकुमार बागुल यांच्या मार्गदर्शनाखाली पो.उ.नि. एम. के. बेंडकोळी, पो.कॉ. सुकराम सावकारे, मनोज म्हस्के, भूषण माळी, प्रशांत ठाकूर, साहेबराव कोळी, सागर महाजन, महिला पोलिस आशा बावस्कर, सुवर्णा धांडे करत आहेत.
