अमळनेर (प्रतिनिधी) स्वस्त सोने देण्याच्या बहाण्याने टुरिस्ट कंपनीच्या संचालकाने २ लाख ७० हजार रुपये घेवून फसवणुक केल्याची घटना उघडकीस आली होती. याप्रकरणी अमळनेर पोलिसात टुरीस्ट कंपनीच्या संचालकाविरुद्ध गुन्हा दाखल करण्यात आला आहे.
शैलेश भोगीलाल शहा (वय ६०, रा. न्यू. प्लॉट भागवत रोड) या भारत हॉलिडे इंटरनॅशनल टुरिस्ट कंपनीकडे भूतान जाण्यासाठी दि. १ ऑक्टोबर २०२३ रोजी बुकिंग केले होते. दि २ रोजी त्यांनी आगाऊ रक्कम म्हणून ५ हजार रुपये टुरिस्ट कंपनी मालक कल्पेश बाबूलाल पनारा यांच्या नावाने पाठवले. त्यानंतर पनारा यांनी अहमदाबाद जिल्ह्यातील वेजलपूर येथील बँकेत १ लाख रुपये ट्रान्सफर केले. दि. ३१ ऑक्टोबर रोजी शैलेश यांची पत्नीच्या मोबाईलवरुन कल्पेश यांनी फोन करुन भूतानमध्ये सोने २७ हजार रुपये तोळे आहे. आमचे एजंट बुकिंग करून ठेवतील व टुरच्या दरम्यान तुम्हाला सोने मिळून जाईल असे सांगितले. त्यानुसार शैलेश यांनी दि. ४ नोव्हेंबर २०२३ रोजी टुर मालक पनारा यांच्या बँक खात्यामध्ये २ लाख ७० हजार रुपये ट्रान्सफर केले.
दि. ८ रोजी शहा कुटुंबीय भूतानला गेल्यानंतर त्यांनी सोनेबाबत विचारणा केली. यावेळी पनारा याने टुरच्या शेवटच्या दिवशी ते तुम्हाला देण्यात येणार असल्याचे सांगितले. दि. १५ रोजी अखेरच्या दिवशी दुर मालकाला विचारले असता सोने काही मिळाले नाही तुम्ही अमळनेरला गेल्यावर तुम्हाला तुमचे पैसे परत करणार असे सांगितले. वारंवार विचारणा करूनही पैसे परत केले नाही, म्हणून अखेरीस शैलेश शहा यांनी अमळनेर पोलीस स्टेशनला कल्पेश पनारा विरुद्ध फसवणुकीचा गुन्हा दाखल केला. पुढील तपास हेडकॉन्स्टेबल अशोक साळुंखे करीत आहेत.
