चंडीगड (वृत्तसंस्था) हरयाणात चक्क सायबर फसवणुकीचे चक्क कोचिंग सेंटर उघडला गेल्याचा धक्कादायक प्रकार उघडकीस आला आहे. या क्लासमध्ये सायबर फसवणुकीचे प्रशिक्षण दिले होते आणि त्याची फी ४० हजार ते १ लाख रुपयांपर्यंत होती. नूंह जिल्ह्यात पकडलेल्या २०० सायबर ठगांची चौकशी सुरू असून, त्यातून ही माहिती समोर आली आहे.
नूंहमध्ये अलीकडेच ५००० पेक्षा जास्त पोलिसांनी एकाचवेळी १४ गावांत ३०० ठिकाणी छापेमारी केली होती. त्यातून अनेक धक्कादायक गोष्टी समोर आल्या आहेत. सायबर ठगांनी कोचिंग सेंटर उघडत विद्यार्थ्यांसाठी अभ्यासक्रमांबरोबरच त्यांचा गणवेशही निश्चित केला होता.प्रशिक्षणासाठी प्रवेश घेण्यापूर्वी युवकांना प्रश्नोत्तराच्या मोठ्या प्रक्रियेतून जावे लागत होते. दरम्यान, पोलिस आता या प्रशिक्षण केंद्रांच्या रॅकेटचा पर्दाफाश करण्याच्या तयारीत असून आतापर्यंत ४७ जणांना अटक तर १६० जणांना ताब्यात घेतले होते.
पोलीस तपासात सायबर फसवणुकीचे प्रशिक्षण घेण्यासाठी युवकांकडे त्यांचा स्वतःचा लॅपटॉप व एखाद्या कॉल सेंटरमधील कामाचा अनुभव कोचिंग सेंटरवाल्यांनी आवश्यक केला होता. तसेच या फसवणुकीचे इतर राज्यांतही काही लागेबांधे आहेत का?, याचाही आता पोलीस शोध घेत आहेत. दरम्यान, याबाबतचे वृत्त आज एका दैनिकाने प्रसिद्ध केले आहे.
