जळगाव (प्रतिनिधी) जळगाव जिल्हा सरकारी नोकरांची पतपेढी असलेल्या ग.स.सोसायटीच्या अध्यक्षपदाची निवड झाली असून सहकार गटाने लोकसहकारच्या दोन सदस्यांच्या मदतीने आपली सत्ता काबीज केली आहे. यात अध्यक्षपदी पॅनल प्रमुख उदय पाटील तर उपाध्यक्षपदी लोकसहकारचे फुटीर सदस्य रवींद्र सोनवणे यांची आज निवड जाहीर करण्यात आली.
सहकार गटाने नऊ जागा तर लोकसहकार आणि प्रगती शिक्षक सेना या दोन्ही पॅनलला देखील प्रत्येकी सहा जागा मिळाल्याने सत्ता स्थापनेचा तिढा वाढला होता. यात प्रगती शिक्षक सेना पॅनलने पहिल्यांदा आपल्याला अध्यक्षपद हवे ही मागणी लाऊन धरली. बुधवारी लोकसहकार आणि प्रगती शिक्षक सेनेच्या पॅनलने संयुक्त पत्रकार परिषद घेऊन सत्ता स्थापन करण्याचा दावा केला. यात अध्यक्षपदी रावसाहेब पाटील तर उपाध्यक्षपदी अनिल गायकवाड हे अर्ज भरणार असल्याची माहिती देखील देण्यात आली. यानंतर सायंकाळी सहकार गटाचे नेते उदय पाटील यांनी एक फोटो सोशल मीडियात व्हायरल करत आपल्यासोबत अकरा मतांचे बहुमत असल्याचे जाहीर होते.
साडेबारा वाजेच्या सुमारास दोन्ही पॅनलचे संचालक सोसायटीत निवड प्रक्रियेसाठी दाखल करत असतांनाच लोकसहकारचे दोन सदस्य हे सहकार पॅनलच्या संचालकांसोबत आल्याने एकच खळबळ उडाली. लोकसहकारच्या समर्थकांनी आक्रमक पवित्रा घेत या दोघांना सभागृहात जाऊ देणार नसल्याची भूमिका घेतली. यामुळे येथे प्रचंड गोंधळ उडाला. बराच वेळ संचालकांनामध्ये जाण्यापासून रोखण्यात आले. अखेर प्रचंड पोलीस बंदोबस्तात एक वाजता सहकार गटाचे सर्व संचालक लोकसहकारच्या दोन सदस्यांसह सभागृहात दाखल झाले. सभागृहात जाण्याआधी मनोज पाटील म्हणाले की, आमचे रवींद्र सोनवणे (भडगाव) आणि ज्ञानेश्वर सोनवणे (जळगाव) हे दोन सदस्य फुटले असून विरोधी सहकार गटाने आमीष दाखवून आमच्या संचालकांना फोडल्याचा आरोप त्यांनी केला.
यानंतर सोसायटीचे अध्यक्ष आणि उपाध्यक्षपदाची निवड प्रक्रिया सुरू झाली. यात लोकसहकार आणि प्रगती शिक्षक पॅनलतर्फे अनुक्रमे रावसाहेब पाटील आणि अनिल गायकवाड यांनी अर्ज दाखल केले. तर सहकार पॅनलतर्फे अध्यक्ष आणि उपाध्यक्षपदासाठी अनुक्रमे पॅनल प्रमुख उदय पाटील आणि लोकसहकारचे फुटीर सदस्य रवींद्र सोनवणे यांनी अर्ज दाखल केले. यात अध्यक्ष व उपाध्यक्षपदी सहकारच्याच उमेदवारांना विजय प्राप्त केला. सहकारच्या दोन्ही उमेदवारांना प्रत्येकी ११ तर लोकसहकार व प्रगती शिक्षक सेनेच्या संयुक्त उमेदवारांना प्रत्येकी १० मते पडली.
