मुंबई (वृत्तसंस्था) डोंबिवलीत एका अल्पवयीन मुलीवर ३० जणांनी सामूहिक बलात्कार करण्यात आल्याची घटना समोर आली आहे. डोंबिवली पूर्वेला मानपाडा पोलीस स्टेशनच्या हद्दीत हा सर्व प्रकार घडला असून पोलिसांनी याप्रकरणी आरोपींविरोधात गुन्हा दाखल केला आहे. पीडित मुलगी १५ वर्षांची अल्पवयीन आहे. या प्रकरणी आत्तापर्यंत २८ आरोपींना ताब्यात घेण्यात आल्याची माहिती समोर आली आहे.
पोलीस सूत्रांनी दिलेल्या माहितीनुसार, बुधवारी सकाळी हा सगळा प्रकार उघडकीस आला. डोंबिवलीच्या भोपर परिसरात ही घटना घडली आहे. १५ वर्षीय अल्पवयीन मुलीवर तब्बल ३० आरोपींनी मिळून सामूहिक बलात्कार केला. आरोपींमधील २८ जणांना मानपाडा पोलिसांनी ताब्यात घेतलं आहे.
पुण्यातील अल्पवयीन मुलीवरील अत्याचार आणि त्यापाठोपाठ मुंबईतील साकीनाका प्रकरण ताजे असतानाच ही घटना उघडकीस अाल्याने संताप व्यक्त केला जात आहे. डोंबिवलीनजीक असलेल्या भोपर परिसरात राहणाऱ्या १५ वर्षीय मुलीची एका तरुणाशी ओळख होती. जानेवारी महिन्यात मुलीच्या प्रियकराने तिच्यावर अत्याचार करून व्हिडिओ तयार केला आणि त्यानंतर ब्लॅकमेल करण्यास सुुरुवात केली. याच व्हिडिओचा वापर करून त्याचे मित्र आणि इतरांनी तिच्यावर विविध ठिकाणी अत्याचार केल्याची माहिती अतिरिक्त पोलिस आयुक्त दत्तात्रय कराळे यांनी दिली.
जानेवारी ते सप्टेंबर या ९ महिन्यांच्या कालावधीत तब्बल ३० जणांनी डोंबिवली, रबाळे, वडवली, बदलापूर या विविध ठिकाणी तिला नेत सामूहिक अत्याचार केल्याचा आरोप पीडितेने केला आहे. दोन दिवसांपूर्वी ७ आरोपींनी पीडितेला वडवली येथे नेत तिच्यावर सामूहिक अत्याचार केला. त्यानंतर तिला प्रचंड वेदना होऊ लागल्याने तिने ही घटना आपल्या आईला सांगितली. दरम्यान, पीडितेला उपचारासाठी कळवा येथील सिव्हिल रुग्णालयात दाखल करण्यात आले असून तिची तब्येत स्थिर आहे.
