नाशिक (वृत्तसंस्था) आपली मंत्रालयात ओळख. तुम्हाला अगदी स्वस्तात प्लॅट मिळवून देतो, अशा नाना थापा मारून नाशिकमधील नणंद-भावजयीला ४३ लाखांचा गंडा घातल्याचे समोर आले आहे. याप्रकरणी युवराज भोसले विरोधात नाशिकरोड पोलीस ठाण्यात तक्रार झाली आहे.
नाशिकमधील गांधीनगर भागात कुमावत कुटुंब राहते. यातील एक महिला सरकारी नोकरी करतात. त्या मैत्रीण जयश्री भालेरावसोबत पैठणी साडी शुटींगसाठी गेलेल्या. यावेळी त्यांची युवराज बाळासाहेब भोसलेसोबत ओळख झाली. त्याने काही दिवसांनंतर कुमावत यांना पैठणी साडीच्या शुटींगसाठी निवड झाल्याचे फोन करून सांगितले. मात्र, कुमावत यांनी बिझी असल्याचे सांगत नकार कळवला आणि आपल्या भावजयीचा नंबर दिला. युवराजने भावजयीला नाना थापा मारल्या. आपली मंत्रालयात ओळख आहे. अवघ्या १८ लाख रुपयांत नाशिकमधील गंगापूर एरियात तुम्हाला प्लॅट घेऊन देतो, असे आमिष दाखवले. त्यासाठी त्यांनी कुमावतला १८ लाखांची रक्कम दिली.
युवराज भोसलेने २०२० ते २०२१ मध्ये या नणंद – भावजयींना विविध आमिष दाखवत वेगवेगळ्या नावांनी ४२ लाख ६३ हजारांचा गंडा घातला. कधी तो ट्रेडिंगसाठी पैसे मागायचा, तर कधी आयफोन नावावर करून देण्यासाठी. इतकेच काय आपल्याकडे सोन्याचे बिस्कीट असून, तुमचे काही दागिने द्या. त्यात भर घालून देतो, अशी थापही त्याने मारली. त्या सोन्यावरही युवराज भोसलेने डल्ला मारला. अखेर ही फसवणूक थांबत नसल्याचे पाहून कुमावत नणंद-भावजयींनी नाशिकरोड पोलीस ठाण्यात तक्रार नोंदवली आहे.
