जळगाव (प्रतिनिधी) भाजपचे नेते आणि मंत्री गिरीश महाजन (GirishMahajan) यांच्यावर सीबीआयने (CBI) गुन्हा दाखल केल्याची राज्यात जोरदार चर्चा सुरू आहे. परंतू सीबीआयने गिरीश महाजनांवर कुठलाही गुन्हा दाखल केलेला नाही,अशी माहिती उपमुख्यमंत्री तथा राज्याचे गृहमंत्री देवेंद्र फडणवीस यांनी दिली आहे. तर दुसरीकडे सीबीआय चौकशीची मागणी आम्हीच केली असून सत्य उघड होण्याच्या मार्गावर असल्याची प्रतिक्रिया मंत्री गिरीश महाजन यांनी दिली आहे.
याबाबत फडणवीस प्रतिक्रिया देतांना पुढे म्हणाले की, सीबीआयने गिरीश महाजनांवर कुठलाही गुन्हा दाखल केलेला नाही. मागच्या काळात सीआयडीकडे जो गुन्हा दाखल झाला होता, तो आम्ही सीबीआयला हस्तांतरीत केला आहे. त्याच प्रकरणात मी एक पेन ड्राइव्ह दिला होता. त्या पेन ड्राइव्हमध्ये कशाप्रकारे खोट्या केसेस दाखल करायच्या याचा खुलासा झाला होता. तसेच यामागे कोण आहेत तेही समोर आले होते. हे सगळे प्रकरण आता सीबीआयकडे गेले आहे. सीबीआय या प्रकरणाची चौकशी करत आहे. त्यामुळे गिरीश महाजन यांना जेलमध्ये टाकण्याचं षडयंत्र असेल. तसेच आमच्यावर खोटे गुन्हे दाखल करण्याचे षडयंत्र असेल, या सर्व गोष्टींचा पेन ड्राइव्हच्या माध्यमातून खुलासा झाला होता. आता त्याची चौकशी सीबीआय करते आहे, अशी माहिती देवेंद्र फडणवीस यांनी दिली आहे. त्यांनी महाजनांवर गुन्हा दाखल झाल्याच्या वृताचे खंडन केले आहे. तसेच गिरीश महाजनांवर सीआयडीकडे दाखल गुन्हा सीबीआयकडे वर्ग करण्यात आल्याची माहिती दिली. ते आज मुंबईत पत्रकारांशी बोलत होते. परंतू अनेक चॅनेल गुन्हा दाखल झाल्याचेच म्हणत आहेत. यामुळे काहीसा संभ्रम आहे.
सूडाचे राजकारण केले जात असल्याचा महाजन यांचा होता आरोप
जळगाव जिल्हा मराठा विद्या प्रसारक सहकारी समाजाचे संचालक विजय पाटील यांनी मंत्री गिरीश महाजन, रामेश्वर नाईक, तानाजी भोईटे, सुनील झंवर, नीलेश भोईटे, वीरेंद्र भोईटे यांच्यासह २७ जणांविरुद्ध कोथरूड पोलिस ठाण्यात गुन्हा दाखल केला होता. आपले अपहरण करून राजीनामा देण्यास भाग पाडल्याचा आरोप त्यांनी केला होता. मात्र, मंत्री गिरीश महाजन यांनी सर्व आरोप फेटाळून लावले होते. तसेच त्यांच्याविरोधात सूडाचे राजकारण केले जात असल्याचे त्यांनी म्हटले होते. अगदी काही दिवसांनी स्टिंग ऑपरेशनच्या माध्यमातून याबाबतचा मोठा स्फोट तत्कालीन विरोधी पक्षनेते देवेंद्र फडणवीस यांनी केला होता.
स्टिंग ऑपरेशन प्रकरणी महाजन यांनी केली होती चौकशीची मागणी
भाजपचे आमदार गिरीश महाजन यांची तत्कालीन विशेष सरकारी वकील प्रवीण चव्हाण यांच्या विरोधात तक्रार दाखल केली होती. पुण्याच्या शिवाजीनगर पोलीस ठाण्यात चव्हाण यांच्या विरोधात लेखी तक्रार दाखल करण्यात आली होती. देवेंद्र फडणवीस यांनी विधानसभेत दाखवलेल्या स्टिंग ऑपरेशन प्रकरणी चव्हाण यांच्या चौकशीची मागणी करण्यात आली होती. दरम्यान पुणे पोलिसांनी याप्रकरणी तक्रार अर्ज सीआयडीकडे दिला होता. या प्रकरणाचा तपास सीआयडी करणार असल्याचे गृहमंत्र्यांनी सांगितलं होतं. परंतू त्यानंतर हे प्रकरण नुकतेच सीबीआयकडे वर्ग झाले होते.
सीबीआय चौकशीची मागणी मीच केलीय, सत्य उघड होण्याच्या मार्गावर : गिरीश महाजन
काही जण मुद्दाम माझ्याविरुद्ध गुन्हा दाखल झाल्याची अफवा पसरवत आहेत. परंतू राज्याचे गृहमंत्री फडणवीस साहेबांनी याबाबत खुलासा करून विरोधकांना तोंडघशी पाडले आहे. मुळात सीबीआय चौकशीची मागणी मीच केली आहे. अगदी सत्य उघड होण्याच्या मार्गावर असून लवकरच माझ्याविरुद्धचा षडयंत्राचा भांडाफोड होणार आहे. काही जण नको त्या चर्चा करून असुरी आनंद घेताय. परंतू पुन्हा सांगतो षड्यंत्र उघड होणार असून सत्य उघड होण्याच्या मार्गावर असल्याची प्रतिक्रिया मंत्री गिरीश महाजन यांनी दिली आहे.
काय आहे प्रकरण?
जळगावमधील निभोरा पोलीस ठाण्यात याबाबत प्रथम फिर्याद नोंदविण्यात आली होती. जळगाव जिल्हा मराठा विद्या प्रसारक समाज संस्थेचे विश्वस्त अॅड. विजय पाटील यांनी ही तक्रार दाखल केली होती. मात्र, कोथरूड परिसरात ही घटना घडल्यामुळे फिर्याद तिकडे वर्ग करण्यात आली होती. तक्रारदाराने केलेल्या तक्रारीनुसार ट्रस्टची कागदपत्रे घेण्यासाठी तक्रारदाराला पुण्यात बोलविण्यात आले होते. तिथे त्यांना प्रथम एका हॉटेलमध्ये आणि नंतर एका फ्लॅटमध्ये नेण्यात आले. त्यानंतर काही लोकांनी, “गिरीशभाऊंना ट्रस्टवर ताबा हवा, म्हणून तुम्ही आता राजीनामा द्या”, अशी धमकी दिल्याचं पोलीस तक्रारीमध्ये पाटील यांनी म्हटले होते. परंतू महाजन यांनी हे सर्व आरोप फेटाळून लावत चौकशीची मागणी केली होती.
