जळगाव (प्रतिनिधी) जिल्ह्यातील 4285 एसटी कर्मचाऱ्यांना 34 टक्के प्रमाणे महागाई भत्ता लागू महागाई भत्ता मिळणार आहे. ऑक्टोबर 2018 पासून महागाई भत्त्याची रक्कम थकीत असून नुकतीच राज्य सरकारने एसटी कर्मचाऱ्यांना 34 टक्क्यांनुसार महागाई भत्ता देण्याची घोषणा केली आहे.
राज्य सरकारी कर्मचाऱ्यांना 38 टक्के महागाई भत्ता देण्यात येतो. मात्र, आतापर्यंत एसटी कर्मचाऱ्यांना दिला जाणारा महागाई भत्ता खूपच नगण्य होता. मात्र, नुकताच या एसटी कर्मचाऱ्यांना 34 टक्के महागाई भत्ता लागू करण्यात आल्याची घोषणा राज्य सरकारने जाहीर केली. या कर्मचाऱ्यांना जुलै 2016 मध्ये 2 टक्के, जानेवारी 2017 ला 4 टक्के, जुलै 2017 5 टक्के, जानेवारी 2018 ला 7 टक्के, ऑक्टोबर 2018 ला 9 टक्के, ऑक्टोबर 2019 ला 12 टक्के, ऑक्टोबर 2021 ला 21 टक्के तर नोव्हेंबर 2022 ला हा महागाई भत्ता 34 टक्के करण्यात आला. महागाई भत्त्यात वेळोवेळी वाढ जरी झाली असली तरी या कर्मचाऱ्यांची यातील फरकाची रक्कम तीन कोटीपेक्षा अधिक असल्याने ती राज्य सरकारने लवकर देण्याची गरज कर्मचाऱ्यांमधून व्यक्त करण्यात येत आहे. दरम्यान, एसटी कर्मचाऱ्यांना राज्य सरकारी कर्मचाऱ्यांप्रमाणे ३४ टक्के महागाई भत्ता देण्याचा निर्णय मागील काही काळापासून रखडला होता. या प्रस्तावित भत्त्यावर निर्णय होत नसल्याने एसटी कामगार संघटना आक्रमक झाल्या होत्या तसेच त्यांच्याकडून आंदोलनाचा इशारा देखील देण्यात आला होता.
