जालना (वृत्तसंस्था) शहरातील मंठा चौफुली या गजबजलेल्या परिसरात आज सोमवारी (दि.११) भरदुपारी गावठी पिस्तुलातून गोळ्या झाडून तरुणाचा निर्घृण खून करण्यात आला. या थरारक घटनेमुळे शहरासह जिल्हाभरात एकच खळबळ उडाली आहे. गजानन मच्छिन्द्र तौर (वय ३२, रा. जालना) असे खून झालेल्या या तरुणाचे नाव आहे.
डॉक्टरांनी तपासून केले मृत घोषीत !
अज्ञात हल्लेखोरांच्या हल्ल्यात गंभीर जखमी अवस्थेत तौर यांना खाजगी रूग्णालयात नेण्यात आले, परंतू डॉक्टरांनी तपासून मृत घोषीत केले. त्यानंतर त्यांचा मृतदेह शवविच्छेदनासाठी जिल्हा सामान्य रुग्णालयात हलविण्यात आला. परंतू जालन्यात इनकॅमेरा शवविच्छेदनाची सुविधा नसल्याने त्यांचा मृतदेह छत्रपती संभाजीनगर येथील घाटी रूग्णालयात पाठवण्यात आला आहे. ही घटना सोमवारी (दि.११) दुपारी दीड वाजेच्या सुमारास मंठा चौफुली परीसरातील होंडा शोरूमजवळ घडली. दरम्यान, मौजपुरी पोलिस आणि स्थानिक गुन्हे शाखेच्या पोलिसांनी एकाला ताब्यात घेतले तर दोघे फरार झाले आहेत. लक्ष्मण गोरे (रा. खरपुडी) असे ताब्यात घेतलेल्या संशयीत तरूणाचे नाव असल्याचे पोलिसांनी सांगितले.
एक गोळी डोक्यात एक घुसली पोटात !
मयत गजानन तौर हे चारचाकी वाहनातून रामनगर कारखान्याकडून जालन्याकडे येत होते. जालन्यात मंठा चौफुली परीसरातील वाहनाच्या शोरूमजवळ संशयीत हल्लेखोर हे अगोदरपासूनच थांबलेले होते. ते ओळखीचेच असल्याने त्यांना पाहून मयत तौर यांनी गाडी थांबवली. गाडीतून उतरून तौर हे हल्लेखोरांच्या दिशेने जात असताना तिघांनी त्यांच्याकडे असलेल्या गावठी पिस्तुलातून तौर यांच्या दिशेने गोळीबार केला. त्यात एक गोळी थेट डोक्यात व एक पोटात घुसल्याने तौर हे जागीच कोसळले.
हल्लेखोर पसार !
गोळीबार करून हल्लेखोर रामनगर कारखान्याच्या दिशेने पसार झाले. पोलिसांनी घटनास्थळावरून एक चाकूही जप्त केला. गंभीर जखमी तौर यांना शहरातील खाजगी रुग्णालयात दाखल करण्यात आले, परंतू डॉक्टरांनी तपासून मृत घोषीत केल्याने मृतदेह जिल्हा सामान्य रूग्णालयात नेण्यात आला. याठिकाणी मोठा जमाव जमल्याने पोलिस बंदोबस्त वाढविण्यात आला आहे. दरम्यान, इनकॅमेरा शवविच्छेदनाची जालन्यात सुविधा नसल्याने तौर यांचा मृतदेह छत्रपती संभाजीनगर येथील घाटी रूग्णालयात रवाना करण्यात आला होता.
पोलिसांनी एका संशयिताला घेतले ताब्यात !
गजानन तौर यांच्यावर हल्ला करून हल्लेखोर रामनगर कारखान्याच्या दिशेने फरार झाल्याची माहिती मिळताच वरिष्ठ अधिकाऱ्यांनी मौजपुरी पोलिसांना माहिती देवून नाकाबंदी करण्याच्या सूचना दिल्या व स्थानिक गुन्हे शाखेची टीम रामनगरकडे निघाली. इकडे मौजपुरीचे सपो निरीक्षक मिथून घुगे, पोलिस उपनिरीक्षक राकेश नेटके, प्रदिप पाचरणे, अविनाश मांटे, पंकज बाजड आदींनी रामनगरजवळ नाकाबंदी लावली, परंतू हल्लेखोरांची स्विफ्ट डिझायर कार नाकाबंदी चुकवून पुढे निघाल्याने मौजपुरी पोलिसांनी कारचा पाठलाग सुरू केला, सदर कार परत रामनगरकडे येत असताना खड्ड्याचा अंदाज न आल्याने कार खड्ड्यात कोसळली, परंतू पोलिस पाठलाग करीत असल्याने तिघांपैकी दोघांनी पळ काढला तर एक पोलिसांच्या हाती लागला. लक्ष्मण गोरे (रा. खरपुडी) असे त्याचे नाव असून गुन्ह्यात वापर झालेली स्विफ्ट डिझायर कार (क्र. एम.एच.४३ ए.एल. ५४४८) ही जप्त करण्यात आली.
