धरणगाव (प्रतिनिधी) तालुक्यात व संबंध महाराष्ट्रात कोरोनाचा कहर पहायला मिळत आहे. या परिस्थितीचा विचार करता स्वस्त धान्याचे वाटप दुकानदारांच्या थंबने (अंगठ्याने) करण्यात यावी या मागणीसाठी आज धरणगाव तालुका स्वस्त धान्य दुकान संघटनेच्यावतीने तहसिल कार्यालयात निवेदन देण्यात आले.
याबाबत सविस्तर माहिती अशी की, संपूर्ण महाराष्ट्रात आणि विशेषतः धरणगाव तालुक्यात कोरोनाने थैमान घातले आहे. धरणगाव शहर व तालुक्यातील जनतेला या आजाराने वेठीस धरले आहे. अनेक व्यक्ती कोरोनामुळे मृत्युमुखी पडले आहेत. अनेक ग्राहक व स्वस्त धान्य दुकानदार पॉझिटिव्ह आले आहेत. या सर्व परिस्थितीचा विचार करता स्वस्त धान्य दुकानदार यांच्या थंबने (अंगठ्याने) स्वस्त धान्य वाटप करण्याची परवानगी देण्यात यावी, अशी मागणी करण्यात आली. कारण शासनाने स्वस्त धान्य दुकानदारांना कोरोना झाल्यास किंवा मृत्युमुखी पडल्यास कोणत्याही प्रकारची मदत अथवा विमा योजना आजपावेतो दिलेली नाही. प्रत्येकाला आपला जीव प्रिय आहे आणि अशा जीवघेण्या परिस्थितीत आम्ही ग्राहकांचे थंब घेऊन जीव धोक्यात घालणार नाहीत, अशी भावना या निवेदनाद्वारे व्यक्त करण्यात आली आहे. आज अनेक स्वस्त धान्य दुकानदार गृहविलगिकरण कक्षात आहेत, अशा परिस्थितीत जीविताला धोका निर्माण होऊ नये म्हणून या मागणीचा विचार करून लवकरात लवकर निर्णय घेण्यात यावा. ह्या बाबतीत स्वस्त धान्य दुकान संघटनेच्यावतीने नायब तहसिलदार प्रथमेश मोहोळ यांना देतांना आर. डी. पाटील, रविभाऊ महाजन, अरविंद कुमार ओस्तवाल आदी उपस्थित होते.
