यवतमाळ (वृत्तसंस्था) उसने पैसे देण्यास नकार दिल्याच्या कारणातून ग्रामपंचायत कर्मचाऱ्याची चाकूने गळा चिरून निर्घुण हत्या करण्यात आली. तसेच मृतकाला वाचविण्यासाठी धावलेल्या एकालाही गंभीर जखमी केल्याची घटना तालुक्यातील धनसळ येथे २५ ऑगस्ट रोजी सकाळी ८.३० ते ९ वाजताच्या सुमारास घडली.
सुरेश मल्हारी कवडे (वय ३७, रा. घनसळ) असे मृताचे तर मृतकाचा मित्र प्रवीण सात्विक थिटे (वय २६ रा. धनसळ) असे गंभीर जखमीचे नाव आहे. खंडू लक्ष्मण गुळवे (वय ३५) असे आरोपीचे नाव आहे. याबाबत मृतकाची पत्नी शिल्पा सुरेश कवडे (वय ३०) यांनी पुसद ग्रामीण पोलीस स्टेशनला दिली. मृतक किराणा व्यवसायिक तसेच ग्रामपंचायतीला कर्मचारी म्हणून कार्यरत होता. मृतक सुरेशकडून आरोपी खंडूने दोन ते तीन वर्षांपूर्वी ५० हजार रुपये उसणवारीने घेतले. ही रक्कम परत देत नसतानाच आरोपीने मृतकाला दहा हजार रुपये उसणे मागितले होते.
खंडूने २४ ऑगस्ट रोजी रात्री बराचवेळ पैशासाठी पती सुरेशकडे त्याच्याच घरासमोर तगादा लावला होता. मात्र सुरेशने दुकानात किराणा माल भरल्याने जवळ पैसे शिल्लक पैसे नसल्याचे सांगत आधीचा व्यवहार पूर्ण कर, त्यानंतर पैसे देतो, असे सांगितले. दरम्यान २५ ऑगस्टला मृतक सुरेश कटींग करण्यासाठी जात असल्याचे पत्नीला सांगून सकाळी ७.३० वाजता घराबाहेर पडला. ९.३० वाजताच्या सुमारास मृतक सुरेशचा मुलगा संग्रामने वडील व प्रवीण काकाला खंडूने ग्रामपंचायत जवळ चाकू मारल्याचे शिल्पा यांना सांगितले. त्यानंतर त्यांनी ग्रामपंचायत परिसर गाठला.
यावेळी रक्ताच्या थारोळ्यात पडलेल्या पती सुरेश व प्रवीणला गावकऱ्यांच्या मदतीने पुसद येथे आणले. परंतू खाजगी रुग्णालयांनी भरती करून घेण्यास नकार दिल्याने ग्रामीण रुग्णालयात धाव घेण्यात आली. याठिकाणी डॉक्टरांनी सुरेशला मृत घोषित केलं. प्राथमिक माहितीनुसार सुरेश कवडे आणि प्रवीण थिटे हे दोघं ग्रामपंचायत कार्यालयाच्या आवरत उभे असताना आरोपी खंडू गुळवे हा मागून आला व त्याने सुरेशच्या गळ्यात हात टाकला.
क्षणाचा विलंब लावता त्याने सुरेश कवडेचा गळा धारधार चाकूने चिरून रक्तबंबाळ केले. बाजूलाच उभा असलेल्या प्रवीण थिटेने सुरेश कवडे यास वाचविण्यासाठी प्रयत्न केला असता त्याच्या डोक्यावरही चाकूने सपासप वार करून गंभीर जखमी केले. घटनेला आयाम दिल्यानंतर आरोपी पसार झाला. पैसे न दिल्याचा राग मनात धरून पूर्वनियोजितपणे हत्याकांड घडविल्याचे समोर येत आहे. याप्रकरणी पुसद ग्रामीण पोलिसांनी गुन्हा नोंद केला असून फरार आरोपी खंडूचा शोध घेण्यासाठी एलसीबीचे पथक नांदेडच्या दिशेने रवाना झाल्याची माहिती आहे. पुढील तपास एसडीपीओ पंकज अतुलकर यांच्या मार्गदर्शनात सुरु आहे.
