तामसा : हदगाव तालुक्यातील तामसा येथून जवळच असलेल्या टाकराळा फाटा येथे रस्त्याच्या बाजूला थांबलेल्या दोघांना दुचाकीने उडविले असून ते ठार झाले आहेत. हा अपघात शनिवारी दि. ४ मे रोजी सकाळी घडला.
भोकर येथील खाजामिया हसन पठाण ६५ हे नातू सलमान अमजद पठाण ९ आणि कुटुंबीयांसह आपल्या नातेवाईकाकडे कंदुरी खाण्यासाठी गेले होते. दि. ४ मे रोजी हिमायतनगर तालुक्यातील सोनारी फाटा येथे कंदोरीचा कार्यक्रम होता. हा कार्यक्रम आटोपून सकाळी ऑटोने ते गावाकडे निघाले. परंतु ऑटो गरम झाल्याने ते रस्त्याच्या बाजूला थांबले. तेव्हा भोकरकडून हिमायतनगरकडे जाणाऱ्या भरधाव दुचाकीने या दोघांना उडविले. त्यात खाजामिया हसन पठाण व नातू सलमान अमजद पठाण हे गंभीर जखमी झाले. काही मिनिटात खाजामिया हसन पठाण हे जागीच ठार झाले तर ९ वर्षाचा सलमान हा गंभीर जखमी झाला होता.
सलमानच्या आईने घटनास्थळी ये जा करणाऱ्यांना मदत मागितली तेव्हा भोकर तहसीलचे कर्मचारी सिध्दार्थ सोनसळे यांनी आपल्या कारमध्ये सलमान अमजद पठाण याला घेतले आणि उपचारासाठी नांदेडला नेत असताना वाटेतच तोही मरण पावला. सलमान हा आई वडिलांना एकुलता एक मुलगा होता. त्याला पाच बहिणी आहेत. पठाण कुटुंबीय भोकरमधील वडार गल्लीत राहतात. त्यांच्या निधनाने सर्वत्र हळहळ व्यक्त होत आहे. त्यांचा अंत्यविधी भोकरच्या मुस्लिम स्मशानभूमीत दि. ४ मे रोजी दुपारी २ वाजता पार पडला. या अपघात प्रकरणी तामसा पोलिस ठाण्यात कसलीही नोंद झाली नव्हती. मात्र अपघाताची माहिती मिळाल्यावर सपोनि शिवराम तुगावे यांनी भेट देऊन पाहणी केली.
