धरणगाव (प्रतिनिधी) येथील शतकोत्तरी पी. आर. हायस्कूलमध्ये सामाजिक परिवर्तनाचे अग्रदूत राजर्षी शाहू महाराज यांच्या जयंती निमित्त मुख्याध्यापक डॉ.संजीव कुमार सोनवणे यांच्या हस्ते प्रतिमेचे पूजन करून अभिवादन करण्यात आले.
प्रास्ताविक एनसीसी मेजर डी. एस. पाटील यांनी केले. यावेळी बोलताना मुख्याध्यापक डॉ. सोनवणे यांनी छत्रपती शाहू महाराजांच्या सामाजिक कार्याचा धांडोळा घेतला. समतेचा आणि सामाजिक परिवर्तनाचा पुरस्कार करणारे छत्रपती शाहू महाराज हे सर्वार्थाने लोकराजे होते. शिक्षणाद्वारे जातिभेद निर्मूलन, बहुजन समाजाच्या उन्नतीसाठी त्यांना नोकऱ्यांमध्ये आरक्षण, स्रियांच्या प्रगतीसाठी स्त्री शिक्षणास प्रोत्साहन अशा विधायक कार्याद्वारे सामाजिक न्यायाचा नवा अध्याय शाहू महाराजांनी लिहून मोठे उपकार केले आहेत, अशा शब्दांत महाराजांच्या कार्याचा गौरव केला. सूत्रसंचालन शिक्षक बापू शिरसाठ यांनी केले तर आभार कैलास वाघ यांनी मानले. यावेळी उपमुख्याध्यापक आर. के. सपकाळे यांच्या सह शिक्षक-शिक्षिका, शिक्षकेतर कर्मचारी वर्गाने प्रतिमेचे पूजन करून अभिवादन केले.
