अहमदाबाद (वृत्तसंस्था) गुजरातचे मुख्यमंत्री विजय रूपाणी यांनी मुख्यमंत्रीपदाचा राजीनामा दिला आहे. रूपाणी यांनी राज्यपालांची भेट घेतल्यानंतर आपल्या पदाचा राजीनामा दिला आहे. आपल्याला संधी दिली, त्याबद्दल त्यांनी पंतप्रधान नरेंद्र मोदी यांचे आभार मानले आहेत. राज्यपाल आचार्य देवव्रत यांच्याकडे रूपाणी यांनी आज आपला राजीनामा सोपवला.
राजीनामा दिल्यानंतर रूपाणी यांनी पत्रकार परिषद आयोजित केली. त्या वेळी पत्रकार परिषदेत त्यांनी राजीनामा दिल्याची माहिती दिली. राजीनामा दिल्यानंतर आयोजित केलेल्या पत्रकार परिषदेत रुपाणी म्हणाले, मी राजीखुशीनं राजीनामा दिला आहे, कुणाचाही माझ्या दबाव नाही. मला संधी दिल्याबद्दल मी पंतप्रधान नरेंद्र मोदी यांचे आभार मानतो. तसेच माझ्या सहकाऱ्यांचे देखील आभार मानतो, पक्ष जी जबाबदारी सोपवेल ती मी पार पाडणार आहे. जेपी नड्डा यांचे मार्गदर्शन माझ्यासाठी देखील अभूतपूर्व आहे. नरेंद्र मोदींच्या नेतृत्वाखाली राज्य निवडणुका लढतो आणि २०२२ च्या निवडणुकाही त्यांच्या नेतृत्वाखाली लढल्या जाणार आहे. गुजरातला आता नवं नेतृत्त्व मिळेल. नवीन नेतृत्त्वाला संधी देणं ही भाजपची परंपरा आहे. पदाचा राजीनामा देऊन संघटनेसाठी काम करण्याची इच्छा आहे, असं देखील रूपाणी या वेळी म्हणाले.
गुजरातमध्ये पुढील वर्षी विधानसभेच्या निवडणुका होऊ घातल्या आहेत. निवडणुकांना जेमतेम वर्षभराचा अवधी शिल्लक असल्याने विजय रुपाणी यांचा राजीनामा अनेक राजकीय पंडितांना आश्चर्यचकित करणारा आहे. पंतप्रधान नरेंद्र मोदी यांच्याशी चर्चा केल्याशिवाय विजय रुपाणी राजीनाम्याचा निर्णय घेऊ शकणार नाहीत, हे सूर्यप्रकाशाइतकं स्पष्ट आहे. २६ डिसेंबर २०१७ रोजी रुपाणी यांनी दुसऱ्यांदा गुजरातचे मुख्यमंत्री म्हणून शपथ घेतली. भाजपाने गुजरातमध्ये बहुमत मिळवले होते. त्यामुळे आता नवे मुख्यमंत्री कोण याकडे सगळ्यांचे लक्ष असणार आहे.
रुपाणी यांच्या विषयी थोडक्यात
गुजरातमध्ये पुढील वर्षी डिसेंबर २०२२ मध्ये विधानसभेच्या निवडणुका होत आहेत. मात्र त्याआधीच मुख्यमंत्री विजय रुपाणी यांच्या राजीनाम्याने गुजरातच्या राजकारणात खळबळ उडाली. विजय रूपाणी हे भारतीय जनता पक्षाचे ज्येष्ठ नेते आहेत. ते गुजरात विधानसभेत पश्चिम राजकोटचे प्रतिनिधित्व करतात ७ ऑगस्ट २०१६ रोजी त्यांनी गुजरातचे १६ वे मुख्यमंत्री म्हणून शपथ घेतली. त्यांनी गुजरात भारतीय जनता पक्षाचे अध्यक्ष पदही भूषवलं होतं. विजय रुपाणींचा जन्म २ ऑगस्ट १९५६ रोजी रंगून, बर्मा येथे झाला. त्यांच्या वडिलांचे नाव रमणिकलाल आणि आईचे नाव मायाबेन. ते जैन धर्माचे अनुयायी होते. रमणिकलाल कुटुंब १९६० मध्ये बर्मा सोडून भारतात आले. मग ते राजकोट, गुजरात येथे राहू लागले. विजय रुपाणींनी धर्मेंद्रसिंह महाविद्यालयातून पदवी घेतली आणि नंतर सौराष्ट्र विद्यापीठातून एलएलबी केले.
