निंभोरा, ता. रावेर, (प्रतिनिधी) : निंभोरा पोलिसांनी कारवाई करत प्रतिबंधित गुटख्यासह गाडी असा ७ लाख ७० हजारांचा मुद्देमाल जप्त केला आहे.
निंभोरा पोलीस ठाण्याच्या हद्दीतील वडगाव फाट्याजवळ ७ ऑक्टोबरला प्रतिबंधित गुटखा व पान मसाल्याची अवैध वाहतूक करणाऱ्या अपघाती वाहनावर कारवाई करण्यात आली. दरम्यान, एका हुंदाई आय-१० कार (एमएच- २६, व्ही- ४४२३) चा अपघात झाल्याची माहिती मिळाली होती. निंभोरा पोलिसांनी तेथे धाव घेतली असता, कारमध्ये गुटखा आढळला. त्यानंतर औषध व अन्न प्रशासनाच्या विभागाला कळवल्यानंतर पंचनामा करण्यात आला. या कारवाईत प्रिमियम रजनिंगधा, पान पराग, आरएमडी पान मसाला यासारखा ५ लाख ९० हजार ४४० रुपयांचा प्रतिबंधित गुटखा आणि १ लाख ८० हजारांची
हुंदाई कार असा एकूण ७ लाख ७० हजार ४४० रुपयांचा मुद्देमाल जप्त करण्यात आला. या प्रकरणी वाहनचालक अजीम तैय्यब सय्यद (वय २३) आणि त्याचा साथीदार शेख मुदस्सिर कासिम (वय २३, दोघेही रा. छत्रपती संभाजीनगर) यांना अटक करण्यात आली. अन्न सुरक्षा अधिकारी योगराज सूर्यवंशी यांच्या तक्रारीनुसार या दोघांवर निंभोरा पोलीस ठाण्यात विविध कलमांअंतर्गत गुन्हा दाखल करण्यात आला आहे. तपास स.पो.नि. मीरा देशमुख यांच्या मार्गदर्शनात उपनिरीक्षक अभय ढाकणे, हे.कॉ. सतीश सानप, पो.कॉ. किरण जाधव, अमोल वाघ, राहुल घुगे, महेंद्र महाजन, प्रशांत चौधरी, सर्फराज तडवी करत आहेत.
