जळगाव (प्रतिनिधी) – शहरातील जुने बी.जे. मार्केट परिसर तसेच चाळीसगाव येथे हिरापूर रोड ठाकुरवाडी परिसर येथे गोपनीय माहितीवरुन सापळा लावत दोन संशयितांकडून गुटखा, सुगंधित पानमसाला, तंबाखू तसेच आयशर वाहन असा एकुण १६ लाख ९९ हजार ८१८ रुपयांचा मुद्देमाल जप्त केला. या प्रकरणी दोघांवर वेगवेगळे गुन्हे दाखल करण्यात आले. जिल्ह्यात गुटखा तस्करीच्या मागील मास्टरमाईंड तसेच या व्यवसातय आणखी कोणाचा सहभाग याचा कसुन शोध पोलिसांकडून घेतला जात आहे.
अवैध धंद्याविरोधात कठोर व
प्रभावी कारवाई करण्याच्या सुचना पोलीस अधीक्षक श्रीकांत धिवरे यांनी दिल्या होत्या. चाळीसगाव शहर पोलिसांनी हिरापूर रोडवर तर स्थानिक गुन्हे शाखेच्या पथकाने जळगावात अवैध गुटखा विरोधात कारवाई केली.
चाळीसगावात लावला सापळा
चाळीसगाव शहर पोलीस ठाण्याचे प्रभारी अधिकारी अमितकुमार मनेळ हे अवैध धंद्याबाबत गोपनीय माहिती संकलित करीत असताना हिरापूर रोडवरील विनोद किराणा स्टोअर्स ठाकुरवाडी, चाळीसगाव येथे प्रतिबंधित केलेला गुटखा, पानमसाल्याची अवैधरित्या विक्री करण्यात येत आहे, अशी गोपनीय माहिती त्यांना शुक्रवारी मिळाली. नियुक्त करुन रवाना केलेल्या विशेष पथकाने ठाकुरवाडी परिसरात सापळा लावत तपास चक्राला गती दिली असता या ठिकाणी संशयास्पदरित्या वावरताना नचिकेत सुनील येवले (रा. चाळीसगाव) याला ताब्यात घेतले. त्याच्याकडून मोठ्या प्रमाणात गुटखा, पान मसाला जप्त केले. या प्रकरणी चाळीसगाव शहर पोलीस ठाण्यात गुन्हा दाखल करण्यात आला.
