जळगाव (प्रतिनिधी) – महिला शक्ती संघाच्या ‘शिवशक्ती’ हॉल येथे महिला बचत गट व भिशी गटाच्या संयुक्त विद्यमाने विशेष आरोग्य मार्गदर्शन आणि योग प्रात्यक्षिक सत्राचे नुकतेच आयोजन करण्यात आले होते. या कार्यक्रमात मुख्य मार्गदर्शक म्हणून सविता हॉस्पिटलच्या प्रसिद्ध आयुर्वेद व पंचकर्म तज्ज्ञ डॉ. निशा मनोजकुमार पाटील यांनी पावसाळ्यातील बदलते वातावरण, आहार पद्धती आणि महिलांच्या आरोग्याविषयी सविस्तर मार्गदर्शन केले.तसेच महर्षि सदानंद देव विहंगम संस्थानाच्या माध्यमातून ‘विहंगम योगा’ चा संक्षिप्त परिचय देऊन उपस्थितांकडून योगासनांची प्रात्यक्षिके करून घेण्यात आली.
मधुताई पाटील यांच्या स्वागतगीताने
कार्यक्रमाची सुरुवात झाली. महिला शक्ती संघाच्या कार्याध्यक्ष श्रीमती शैलजादेवी निकम यांनी डॉ निशा पाटील यांचा परिचय करून देताना त्यांच्या आरोग्य क्षेत्रातील आणि योग क्षेत्रातील कार्याबद्दल विस्तृत माहिती दिली. घर सांभाळुन , डॉक्टरी व्यवसायाबरोबरच समाजसेवेचे व्रत सांभाळत असल्याबद्दल देखील त्यांनी डॉ निशा यांचे कौतुक केले. उपस्थितांचे स्वागत कुसुमबाई पवार व मीना पवार यांनी केले.यावेळी नयना पाटील, सुवर्णा निकम, मीना पवार, दिपाली देशमुख, अलका पाटील, रूपाली पाटील यांच्यासह बचत व भिशी गटातील महिला मोठ्या संख्येने उपस्थित होत्या.सूत्रसंचालन , आभार प्रदर्शन सुवर्णा प्रताप निकम यांनी केले.
कार्यक्रमप्रसंगी डॉ. निशा पाटील यांनी पावसाळ्यात शरीराचे व मानसिक स्वास्थ्य कसे टिकवून ठेवावे, ऋतूनुसार पाळावयाचे पथ्य-पाणी आणि या दिवसांत जाणवणाऱ्या मानसिक थकव्यावर (उदासीनता) कोणते उपाय करावेत, यावर सोप्या भाषेत प्रकाश टाकला.तसेच त्वचा व केश विकार, सांधेदुखी, ॲसिडीटी, मायग्रेन आणि वंध्यत्व यांसारख्या आजारांवर आयुर्वेदिक पंचकर्म उपचारांचे महत्त्व सांगतानाच मानसिक आरोग्य व अनिद्रेच्या समस्येवर ‘शिरोधारा’ व ध्यानाचे फायदे विशद केले.मुली वयात येताना घ्यावयाची काळजी आणि शालेय विद्यार्थ्यांसाठीच्या विशेष सत्रांविषयीही त्यांनी माहिती दिली.
