चोपडा (प्रतिनिधी) भगिनी मंडळ चोपडा संचलित, समाजकार्य महाविद्यालय, चोपडा व वैजापूर येथील प्राथमिक आरोग्य केंद्र यांच्या संयुक्त विद्यमाने चोपडा तालुक्यातील देवझिरी येथील शासकीय माध्यमिक आश्रम शाळेत विद्यार्थ्यांचे हिमोग्लोबिन तपासणी शिबिर नुकतेच संपन्न झाले.
समाजकार्य महाविद्यालयातील बीएसडब्ल्यू तृतीय वर्ष व एमएसडब्ल्यू द्वितीय वर्ष क्षेत्रकार्याच्या वैजापूर व मुळ्यावतार गटाचे क्षेत्रकार्य पर्यवेक्षक डॉ. प्रा. आशिष गुजराथी व प्रा. नारसिंग वळवी यांच्या लक्षात आले की आदिवासी भागातील विद्यार्थ्यांमध्ये हिमोग्लोबिनचे प्रमाण कमी असते त्यामुळे त्यांनी सदर शिबिराचे आयोजन केले. सदर शिबिरासाठी वैजापूर येथील प्राथमिक आरोग्य केंद्रातील प्रयोगशाळा अधिकारी राजेंद्र रनाळकर व महालॅब तंत्रज्ञ प्रमोद ठाकरे यांनी बहुमोल असे सहकार्य केले.
सदर शिबिराच्या आयोजनाचे नियोजन क्षेत्रकार्य पर्यवेक्षक डॉ.प्रा. आशिष गुजराथी व प्रा. नारसिंग वळवी यांनी केले. यावेळी राजेंद्र रनाळकर यांनी विद्यार्थ्यांना रक्तातील हिमोग्लोबिनच्या प्रमाणाचे महत्त्व काय व ते किती असावे, ते संतुलित ठेवण्यासाठी आपण कोणता आहार घेतला पाहिजे, कोणती काळजी घेतली पाहिजे याविषयी मार्गदर्शन केले. त्यानंतर आश्रम शाळेतील विद्यार्थ्यांची प्रत्यक्ष हिमोग्लोबिन तपासणी करण्यात आली. या शिबिरामध्ये ४५ मुले व ४० मुलींचे हिमोग्लोबिन तपासण्यात आले. या शिबिरासाठी आश्रम शाळेतील शिक्षक एस.एम.सुरवाडे, सी.जी.बारेला, ए.आर.पावरा, आर.बी.बारेला, एम.झेड.बारेला, सी.जी.बारेला व शिपाई के.के.पावरा यांनी विशेष सहकार्य केले.
तसेच वैजापूर क्षेत्र कार्य गटातील विद्यार्थी दुर्गेश पावरा, हिमानी पाटील, विशाल भालेराव, वैष्णवी धनगर, संदीप पावरा व मुळ्यावतार क्षेत्र कार्य गटातील अजित भिल, दिपाली रामोशी, नेहा देशमुख, लोकेश गवळी, अरुण भोई, अश्विनी धनगर या विद्यार्थ्यांनी परिश्रम घेतले. शिबिराची कार्यवाही पूर्ण झाल्यानंतर सर्व विद्यार्थ्यांनी वैजापूर गावातील आशा वर्कर व ग्रामस्थांना मागील क्षेत्र कार्यात नोंदणी केलेल्या आभा कार्डचे वितरण केले.
