नशिराबाद (प्रतिनिधी) १ मे महाराष्ट्र दिनाचे औचित्य साधत नशिराबाद येथे पत्रकार संघ, नशिराबाद यांच्या वतीने आयोजित करण्यात आलेला सामाजिक व प्रेरणादायी कार्यक्रम हा यंदाचा सर्वात मोठा आणि प्रभावी उपक्रम ठरणार असून, संपूर्ण शहरासह परिसरात याची जोरदार चर्चा सुरू आहे. चला आरोग्यदायी व व्यसनमुक्त महाराष्ट्र घडवू या.. या भक्कम आणि समाजमनाला भिडणाऱ्या संकल्पनेतून हा कार्यक्रम राबविण्यात येत आहे.
आजच्या काळात वाढत्या व्यसनाधीनतेच्या पार्श्वभूमीवर हा कार्यक्रम केवळ औपचारिक न राहता समाजजागृतीची व्यापक चळवळ ठरणार आहे. विशेषत तरुण पिढीला व्यसनाच्या विळख्यातून बाहेर काढण्यासाठी आणि सकारात्मक जीवनमूल्ये रुजवण्यासाठी हा कार्यक्रम एक मोठा टप्पा मानला जात आहे.
कार्यक्रमाचे मुख्य आकर्षण असणार आहे व्यसनमुक्ती या विषयावर भव्य सार्वजनिक कीर्तन, ज्यातून थेट जनतेपर्यंत प्रभावी संदेश पोहोचवला जाणार आहे. कीर्तनाच्या माध्यमातून समाजातील प्रत्येक घटकाला जागृत करण्याचा प्रयत्न होणार असून, हा उपक्रम भावनिक आणि बौद्धिक पातळीवर परिणामकारक ठरण्याची अपेक्षा व्यक्त होत आहे.
या कार्यक्रमासाठी प्रमुख मार्गदर्शक म्हणून डॉ. नितीन विसपुते (मानस तज्ञ) यांची उपस्थिती लाभणार असून, ते व्यसनाधीनतेच्या मानसिक, सामाजिक आणि कौटुंबिक परिणामांवर सखोल मार्गदर्शन करणार आहेत. त्यांच्या मार्गदर्शनामुळे उपस्थितांना नवी दिशा मिळणार असल्याचे मानले जात आहे.
विविध क्षेत्रात उल्लेखनीय कार्य करणाऱ्या मान्यवरांचा भव्य आणि दिमाखदार सन्मान सोहळाही आयोजित करण्यात आला आहे. समाजसेवा, प्रशासन, शिक्षण, पत्रकारिता आणि जनजागृती या क्षेत्रात मोलाचे योगदान देणाऱ्या व्यक्तींना सन्मानित करून त्यांच्या कार्याचा गौरव करण्यात येणार आहे.
सन्मानित मान्यवरांमध्ये प्रमुखतः :
योगेश पाटील, गणेश चव्हाण, स.पो.नि. योगिता नारखेडे, रुपेश ठाकूर, किशोर पाटील, श्रीकिशन साळुंखे, तसेच असलम तनवीर, कल्पेश अहिरे, श्याम कुमावत, सय्यद बरकत अली, राजेंद्र पाटील, साबीर मास्टर, दीपक खासणे आदी मान्यवरांचा समावेश असून, इतर अनेक मान्यवरांची उपस्थिती कार्यक्रमाची शोभा वाढवणार आहे.
कार्यक्रम दि. १ मे २०२६ रोजी सायं. ६:३० वाजता, श्रीराम मंदिर, फ्रूटेस्टल सोसायटी चौक, नशिराबाद येथे पार पडणार असून, या कार्यक्रमासाठी मोठ्या संख्येने नागरिक, युवक, महिला आणि सर्व समाजघटक उपस्थित राहणार असल्याचा अंदाज व्यक्त केला जात आहे. संपूर्ण परिसरात या कार्यक्रमाबाबत उत्सुकता आणि उत्साहाचे वातावरण निर्माण झाले आहे. पत्रकार संघ, नशिराबाद यांचा हा उपक्रम केवळ एक कार्यक्रम न राहता, समाजाला योग्य दिशा देणारी आणि परिवर्तनाची नवी चळवळ उभी करणारी ऐतिहासिक सुरुवात ठरणार असल्याचा विश्वास व्यक्त होत आहे. व्यसनमुक्त, सशक्त आणि जागरूक महाराष्ट्र घडवण्यासाठी हा कार्यक्रम एक प्रभावी पाऊल मानला जात आहे.
नशिराबादमध्ये यंदाचा महाराष्ट्र दिन हा केवळ उत्सवापुरता मर्यादित न राहता, समाजपरिवर्तनाचा निर्णायक टप्पा ठरणार असून, या भव्य कार्यक्रमातून एक नवा आदर्श निर्माण होणार आहे.
