जळगाव (प्रतिनिधी) – एक लाख रुपये गुंतविल्यास पाच लाख रुपये करून देण्याचे अमिष दाखवित जगदीश शंकर व्यास (वय ५८, रा. धानोरा, ता. चोपडा) या कर्जबाजारी व्यापाऱ्याला पाच जणांनी ५ लाख २० हजार रुपयात गंडविले. गुंतवणुकीसाठी आणलेली रक्कम मोजण्याच्या बहाण्याचे घेतली व दुसऱ्या कारमध्ये बसून पाचही संशयित पसार झाले. ही घटना दि. २७ एप्रिल रोजी भरदिवसा भुसावळ रस्त्यावरील हॉटेलनजीक घडली. याप्रकरणी शनिपेठ पोलिस ठाण्यात गुन्हा दाखल झाल्यानंतर एलसीबीच्या पथकाने तपाचक्रे फिरवीत वाशीम येथील पोलीस अंमलदारासह त्याच्या दोघ साथीदारांना छत्रपती संभाजी नगर जिल्ह्यातून ताब्यात घेतले. त्यांना दि. २ मे पर्यंत पोलीस कोठडी सुनावली.
चोपडा तालुक्यातील धानोरा येथील धान्य व्यापारी जगदीश व्यास यांच्या जळगावातील एका मित्राने त्यांना त्याच्या मित्राच्या ओळखीचे काही जण कुठेतरी गुंतवणूक करतात, आणि एक लाख रुपये दिल्यास चार लाख रुपये देतात, असे सांगितले. त्यावर जगदीश
व्यास यांनाही विश्वास बसल्यानंतर त्यांनी गुंतवणूक करण्यास होकार दिला. त्यानुसार दि. २६ एप्रिल रोजी त्यांच्या मित्राने व्यास यांना अजिंठा चौफुलीवरील एका हॉटेलवर बोलवून एका जणाशी भेट घालून दिली. त्या व्यक्तीने जास्त रक्कम गुंतविल्यास जास्त मोबदला मिळतो, असे सांगितल्याने व्यास यांनी पाच लाख रुपये गुंतविण्याचे ठरविले. त्यानुसार समोरील अनोळखी व्यक्तीने दि. २७ एप्रिल रोजी रक्कम घेऊन अजिंठा चौफुलीवर येण्यास सांगितले होते.
पैसे घेवून दोन वेगवेगळ्या ठिकाणी बोलावले
अनोळखी व्यक्तीने सांगितल्याप्रमाणे जगदीश व्यास हे दि. २७ रोजी अजिंठा चौफुलीवरील हॉटेलजवळ पोहचले. त्यांनी संबंधित व्यक्तीला त्यांचा मुलगा रक्कम घेवून येत असल्याचे सांगितल्यामुळे तो व्क्ती बोलत तेथून निघून गेला. त्यानंतर थोड्यावेळाच त्या व्यक्तीने व्यास यांना कालिंका माता चौकातील दुसऱ्या हॉटेजवळ बोलावले. त्यानुसार व्यास हे तेथे गेल्यानंतर त्यांनी मुलगा पंकज व्यास हा ५ लाख २० हजार रुपये घेऊन आला होता.
पोलिसांचे भिती दाखवत संशयित पसार
व्यापारी जगदिश व्यास यांचा मुलगा पंकज व्यास हा रक्कम घेऊन आल्यानंतर येथे पोलिस येण्याची भीती असल्याचे अनोळखीने सांगितले. त्यानंतर पंकज आलेल्या कारमध्येच त्याला घेवून तो अनोळखी इसम आणि त्याचे दोघ साथीदार हे पैसे मोजण्याच्या बहाण्याने भुसावळच्या दिशेने गेले. त्यांच्या पाठोपाठ अन्य दोघ अनोळखी व्यक्ती देखील कार
घेवून त्यांच्या मागे गेले. पाचही जणांनी आपली फसवणूक केल्याचे लक्षात आल्यानंतर जगदीश व्यास यांनी तात्काळ शनिपेठ पोलिस ठाण्यात धाव घेतली. त्यांनी घडलेली घटना पोलीस ठाण्याचे प्रभारी सपोनि साजीद मन्सूरी यांच्यासमोर कथन केल्यानंतर तक्रार दिली. त्यानुसार अनोळखी पाच जणांविरुद्ध फसवणुकीचा गुन्हा दाखल करण्यात आला आहे. पुढील तपास सहायक निरीक्षक साजिद मंसुरी करीत आहेत.
कर्ज फेडण्याच्या अपेक्षेने केली गुंतवणूक व्यापारी असलेले जगदीश व्यास यांच्यावर बँकेचे काही कर्ज आहे. डोक्यावर कर्ज असल्याने गुंतवणुकीतून फायदा होणार असल्याने अधिकची रक्कम गुंतवणूक करून जास्त फायदा झाल्यास कर्ज तरी फिटू शकेल, या अपेक्षेने व्यास यांनी गुंतवणूक केली. मात्र यातून ते हातची रक्कमही गमावून बसल्याने ते हताश झाले आहे. या पथकाची कामगिरी
पोलीस निरीक्षक राहुल गायकवाड यांनी उपनिरीक्षक शरद बागल, सफौ अतुल वंजारी, पोहेकॉ विजय पाटील, नितीन बाविस्कर, प्रवीण भालेराव, मुरलीधर धनगर, अक्रम शेख, छगन तायडे, किशोर पाटील, रवींद्र कापडणे, राहुल रगडे, प्रवीण हिवराळे यांचे पथक रवाना केले. या पथकाला तांत्रिक विश्लेषणासाठी गौरव पाटील, मिलींद जाधव, ईश्वर पाटील, प्रदीप सपकाळे यांच्या पथ काने मदत केली.
