राजकोट (वृत्तसंस्था) गुजरातच्या राजकोटच्या विंछीया गावातील येथे एका जोडप्याने त्यांच्या शेतात स्वतःचे मुंडके कापून हवनकुंडात टाकून दिले. तांत्रिक विधीनंतर या जोडप्याने देवतेला प्रसन्न करण्यासाठी स्वतःचा शिरच्छेद केला. हेमुभाई मकवाना (वय 38) आणि हंसाबेन (वय वर्षीय) अशी मृत जोडप्याची नावे आहेत. अंधश्रद्धेच्या या घटनेने संपूर्ण राज्यासह देशात खळबळ उडाली आहे.
पती-पत्नीने स्वत: असा स्टँड तयार केला होता की, त्यांची दोन्ही मुंडके एकत्र कापून हवनकुंडात पडावी. पती-पत्नीनेच शिरच्छेद करण्यासाठी गिलॉटीनसारखे हत्यार बनवले. शीर कापून हवनकुंडातच पडतील अशा पद्धतीने गिलॉटीन बनवण्यात आले होते. घटनास्थळी पती-पत्नी गिलॉटीन प्लेटखाली पडलेले असल्याचे स्पष्ट झाले आहे. वरची दोरी जळालेली आहे. दोघांनी ब्लेडखाली डोके ठेऊन खालून दोरीला आग लावल्याचे दिसते. आग माथ्यावर पोहोचताच दोरी कापून जड गिलॉटीन गळ्यावर पडले. पोलिसांनी हवन कुंडातून पत्नीचे जळालेले शीर जप्त केले आहे, तर पतीचे शीर हवन कुंडात पडले नाही. कारण, हवनकुंडाच्या वेदीजवळ त्याचे शीर आढळून आले.
घटनास्थळावरून पोलिसांनी दोघांच्या सुसाईड नोटशिवाय 50 रुपयांचा स्टॅम्प पेपरही सापडला आहे. हेमुभाई आणि हंसाबेन मकवाना नावाच्या या दाम्पत्याने अंधश्रद्धेला बळी पडून आत्महत्या केल्याचे यातून स्पष्ट झाले आहे. दरम्यान, कमळाची पूजा करण्याचे कारण काय आहे? त्यांना तांत्रिक विधी करण्यास कोणी प्रवृत्त केले का? तांत्रिक विधी कोणत्या उद्देशाने केला जात होता? कुटुंबातील इतर सदस्यांना तांत्रिक विधींची माहिती नव्हती का?, असे प्रश्न उपस्थित केले जात आहेत. रात्री तांत्रिक पूजा करून पती-पत्नीने हवनकुंडात मस्तक अर्पण केल्याची ही पहिलीच घटना आहे.
मृताच्या वडिलांशी झालेल्या संवादात पती-पत्नी दोघेही गेल्या तीन वर्षांपासून तांत्रिक साधना करत होते आणि हवनकुंडात कमळपूजा करण्यासाठी त्यांनी स्वत: लोखंडी चबुतरा बनवला होता. सध्या दोन्ही मृतदेह हे शवविच्छेदनासाठी नेण्यात आले आहेत. या जोडप्याला दोन मुले, आई-वडील आणि इतर नातेवाईक जवळच राहतात. रविवारी सकाळी कुटुंबीयांना याची माहिती मिळाली आणि त्यांनी पोलिसांना माहिती दिली. या जोडप्याकडून एक सुसाईड नोटही जप्त करण्यात आली असून, त्यामध्ये त्यांनी नातेवाईकांना आई-वडील आणि मुलांची काळजी घेण्याचे आवाहन केले आहे, असे त्यांनी सांगितले.
