भुसावळ (प्रतिनिधी) – रक्षाबंधनानिमित्त घरमालक कुटुंबासह मुंबईला गेल्याची संधी साधत चोरट्यांनी बंद घराला लक्ष्य केले. घराचे कुलूप तोडून घरात प्रवेश करत चोरट्यांनी सोने-चांदीचे दागिने व रोकड असा एकूण १ लाख २८ हजार ८०० रुपये किमतीचा ऐवज लंपास केला. ही घटना शहरातील जळगाव रोड परिसरातील स्वामी विहार भागात घडली.
जळगाव रोडवरील हिरो शोरूममागे, दत्त मंदिराजवळील स्वामी विहार परिसरात धनराज नामदेव नाथ (वय ५९) हे कुटुंबासह वास्तव्यास आहेत. रक्षाबंधनानिमित्त नाथ हे कुटुंबासह मुंबईला गेले होते. घर बंद असल्याची संधी साधत अज्ञात चोरट्यांनी घराच्या वरच्या मजल्यावरील कुलूप तोडून घरात प्रवेश केला. घरात प्रवेश केल्यानंतर चोरट्यांनी कपाटे व इतर साहित्याची उचकापाचक केली. त्यानंतर कपाटातील सोने-चांदीचे दागिने तसेच रोकड असा एकूण १ लाख २८ हजार ८०० रुपये किमतीचा ऐवज घेऊन चोरटे पसार झाले. घरफोडीची माहिती मिळताच भुसावळ शहर पोलीस ठाण्याचे निरीक्षक महेश गायकवाड यांच्यासह पोलिसांनी घटनास्थळी धाव घेत पाहणी केली. परिसरातील सीसीटीव्ही फुटेजची तपासणी केली असता त्यामध्ये एक संशयित चोरटा कैद झाल्याची माहिती सूत्रांनी दिली आहे. त्यामुळे पोलिसांनी चोरट्याचा शोध घेण्यासाठी तपासाला वेग दिला आहे.
याप्रकरणी धनराज नामदेव नाथ यांच्या फिर्यादीवरून भुसावळ शहर पोलीस ठाण्यात अज्ञात चोरट्याविरुद्ध घरफोडीचा गुन्हा दाखल करण्यात आला आहे. पुढील तपास पोलीस उपनिरीक्षक पवन नायमने करीत आहेत.
