जळगाव (प्रतिनिधी) भगवान येशूची प्रार्थना केली नाही तर तुमचे वाईट होईल, तुम्ही ख्रिश्चन धर्मात प्रवेश करा तुमचे सर्व आजार दूर होतील, असे प्रवचनाच्या माध्यमातून सांगत भोळ्या लोकांना ख्रिश्चन धर्मात प्रवेश करण्यास सांगितले. तसेच प्रवचनाच्या माध्यमातून धार्मिक भावना दुखावल्या प्रकरणी चौघांविरुद्ध एमआयडीसी पोलिस स्टेशनला गुन्हा दाखल करण्यात आला आहे.
जळगाव-भुसावळ महामार्गावरील मंगलम लॉन येथील हॉलमधे जमलेल्या सुमारे ३० ते ४० जणांसमोर प्रवचनाच्या माध्यमातून हा प्रचार सुरु होता. ख्रिश्चन धर्मात प्रवेश केल्यानंतर तुमचे सर्व रोग दुर होतील. तसेच आपल्या धर्माबाबत अपप्रचार सुरु असल्याचे बघून किर्तनकार तथा कथाकार योगेश कोळी यांनी याबाबत एमआयडीसी पोलिस स्टेशनला फिर्याद दाखल केली. किर्तनकार योगेश कोळी यांना चुलत भावाच्या वाढदिवसानिमीत्त हॉल हवा होता. त्यामुळे ते महामार्गावरील हॉल बघण्यास आले होते. त्यावेळी त्यांना ख्रिश्चन धर्माचा प्रचार आणि इतर धर्माचा अपप्रचार सुरु असल्याचे दिसून आले.
केवळ ख्रिश्चन धर्मात प्रवेश केल्यानंतरच तुमचे विकार नाहीसे होतील, असा प्रचार या ठिकाणी सुरु असल्याचे दिसून आले. या प्रकरणी सिना संतोष पाटील (रा. कोल्हे हिल्स जाणता राजा शाळेजवळ जळगाव मुळ रा. केरळ), पवन दिपक सारसर (रा. मण्यारखेडा), राजकुमार हरिशंकर यादव (रा. खेडी मुळ रा. उत्तर प्रदेश), प्रदीप बाजीराव भालेराव (रा. वाघनगर जळगाव) अशा चौघांविरुद्ध हा गुन्हा दाखल करण्यात आला असून पुढील तपास एमआयडीसी पोलीस करत आहेत.
