जळगाव (प्रतिनिधी) बीएचआर पतसंस्थेत मालमत्ता खरेदी अथवा पावत्या मॅचिंग प्रकरणात माझा व माझे कुटुंबीय तसेच माझ्या कंपनीचा आरोपींशी काडीचाही संबंध नाही, असे प्रतिपादन चाळीसगावचे आ. मंगेश चव्हाण यांनी आज पत्रकार परिषदेत केले. अगदी सुनील झंवर यांच्याशीही माझा काही संबंध नसल्याचे आ. चव्हाण यांनी सांगितले.
माझ्याबाबत चुकीची माहिती पसरविण्यात आली असून संशय कल्लोळ दूर करण्यासाठी ही पत्रकार परिषद घेतली असल्याचे आ. चव्हाण यांनी सुरुवातीला सांगितले.
बीएचआर सहकारी पतसंस्थेच्या घोटाळ्यातील प्रमुख संशयित आरोपी सुनील झंवर याला अटक झाल्यानंतर या प्रकरणात काही राजकीय मंडळीचा सहभाग असल्याची चर्चा सुरू झाली आहे. यात चाळीसगावचे आमदार मंगेश चव्हाण हे माहिती जमा करत असल्याचे वृत्त काहींनी प्रसिध्द केले होते. याचे खंडन करण्यासाठी आज आमदार चव्हाण यांनी भारतीय जनता पक्षाच्या जिल्हा कार्यालयात आज सायंकाळी पत्रकार परिषद घेतली.
याप्रसंगी आमदार मंगेश चव्हाण म्हणाले की, आपण गेल्या काही महिन्यांमध्ये विरोधी आमदार म्हणून सत्ताधाऱ्यांविरूध्द प्रखर भूमिका घेतली आहे. सरकारच्या विरुध्द अनेक आंदोलने केली आहेत. तसेच गुटख्यासह अनेक अवैध धंद्यांच्या विरूध्द आवाज देखील उठविलेला आहे. यामुळे कुठे तरी आपल्याला अडकवण्याचा प्रयत्न यातून होत आहे. आपण आज लोकप्रतिनिधी असलो तरी याआधी व्यावसायिक आहोत. खूप कष्ट करून आपण उद्योग उभा केला असून यातून सुमारे दोनशे कोटींची उलाढाल होत असते. उद्योगासाठी अनेकदा पैशांची अडचण येत असते. या अनुषंगाने आपण २०१२ साली बीएचआर कडून दोन कोटी रूपयांचे कर्ज घेतले होते. याची फेड आणि २०१६ सालीच केलेली आहे. यानंतर आपला या पतसंस्थेचा आर्थिक गैरव्यवहार व यातील प्रमुख आरोपींशी काडीचाही संबंध नाही. या खटल्यातील माहिती आपण ठेविदारांच्या हितासाठी मागितली असून यासाठी पत्र देखील दिलेले आहे.
तसेच प्रसारमाध्यमांनी ऐकीव माहितीवर अवलंबून न राहता, पुराव्यांवर आधारित बोलावे असेही ते म्हणाले. तर षडयंत्र करून आपल्याला यात गोवण्याचा प्रयत्न करण्यात येत असल्याचा गंभीर आरोप देखील आमदार चव्हाण यांनी या पत्रकार परिषदेत केला.
