जळगाव (प्रतिनिधी) लोकांच्या भाषेत न्यायव्यवहार हे लोकशाही राजव्यवस्थेचे महत्त्वाचे तत्व आहे. त्यासाठी न्यायालयीन कामकाजात इंग्रजीची जागा मराठीने घेतली पाहिजे. राजभाषा ही न्यायभाषा झाली तर खऱ्या अर्थाने मराठी संवर्धनाचे काम होईल, असे प्रतिपादन कवयित्री बहिणाबाई चौधरी उत्तर महाराष्ट्र विद्यापीठाच्या मराठी अभ्यास मंडळाचे सदस्य, साहित्यिक डॉ. संजीवकुमार सोनवणे यांनी केले.
मराठी भाषा पंधरवडा निमित्त जळगाव जिल्हा व सत्र न्यायालयात जिल्हा विधी सेवा प्राधिकरण विभागाच्या वतीने आयोजित ‘न्यायालयीन कामकाजात मराठी भाषेचा वापर ‘या विषयावरील व्याख्यानात ते बोलत होते. अध्यक्षस्थानी प्रमुख जिल्हा व सत्र न्यायाधीश एस. डी. जगमलानी हे होते तर मंचावर जिल्हा वकिल संघाचे अध्यक्ष दिलीप बोरसे, जिल्हा विधी सेवा प्राधिकरणचे सचिव के. एच. ठोंबरे, जिल्हा न्यायाधीश वर्ग २ आर. जे. कटारीया, न्यायधीश वर्ग ३ डी. ए. देशपांडे, न्यायधीश वर्ग ४ एस. जी. ठुबे, जिल्हा वकिल संघाचे उपाध्यक्ष अॅड. प्रभाकर पाटील, सचिव दर्शन देशमुख यांची उपस्थिती होती.
डॉ. संजीवकुमार सोनवणे यांनी बोलीभाषा टिकल्या तर मराठी टिकेल, याची जाणीव करून दिली. ते पुढे म्हणाले की, मराठी भाषेत विपुल साहित्य निर्मिती होऊनही दुर्लक्ष झाले आहे, ज्यावर अन्याय होतो तो दऱ्या कपारीतील, खेडेगावातील सामान्य माणूस आहे, त्याची न्यायालयीन कामकाजाविषयी भिती दूर करण्यासाठी मराठीचा जास्तीत जास्त वापर केला पाहिजे. न्यूनगंड न बाळगता मराठी बोलणं हेच भाषासंवर्धन आहे. कार्यक्रमाचे प्रास्ताविक आणि सूत्रसंचालन के. एच. ठोंबरे यांनी केले तर आभार आठवे दिवाणी न्यायाधीश (कनिष्ठ) पी. ए. श्रीराम यांनी मानले. यावेळी न्यायाधीश, वकील तथा न्यायालयीन कर्मचारी उपस्थित होते.
