फैजपूर (प्रतिनिधी) फैजपूर परिसरात अवैध वाळू वाहतूक अद्यापही बिनबोभाट सुरू आहे. आज ८ मार्च रोजी सकाळी तलाठी प्रशांत जावळे व आमोदा येथील तलाठी एम. डी. खुर्दा यांनी न्हावी-बोरखेडा रस्त्यावर विना नंबरचे ट्रॅक्टर व ट्रॉली क्रमांक (एम.एच १९ सी.यू ८८०२) हे अवैध वाळू वाहतूक करतांना ताब्यात घेतले. सदर ट्रॅक्टर फैजपूर येथील गव्हर्मेंट कॉन्ट्रॅक्टर संजय सुधाकर वाणी व विजय सुधाकर वाणी यांचे असल्याचे सूत्रांनी सांगितले.
येथील तलाठी श्री. जावळे यांनी ट्रॅक्टर ड्रायव्हर मुकेश भास्कर कोळी राहणार फैजपूर यांच्या ताब्यातील वाळूने भरलेला ट्रॅक्टर फैजपूर पोलीस स्टेशनच्या ताब्यात दिला. याबद्दलचा रिपोर्ट तहसीलदार यावल यांना कळविण्यात आला असून पुढील दंडात्मक कारवाई यावल तहसीलदार यांच्या आदेशान्वये होणार आहे.
वाळू वाहतुकीसाठी विना नंबरच्या वाहनांचा सर्रास उपयोग
फैजपूर परिसरात रात्री दहा ते सकाळी पाच वाजले दरम्यान अवैध वाळू मोठ्या प्रमाणात सुरू असते या अवैध वाळू वाहतुकीसाठी वाळूमाफिया विना नंबरचे डंपर, ट्रक आणि ट्रॅक्टरचा वापर सर्रास करीत आहे. यामुळे सदर वाहन कोणाच्या मालकीचे की चोरीचे ? हे कळत नाही. प्रसंगी अशा विना नंबर वाहनाने अपघात घडल्यास संबंधितांना नुकसान भरपाई अथवा इतर कोणतेच लाभ मिळत नाही. अशा वाहनधारकांवर शासनाने निव्वळ दंडात्मक कारवाई न करता फौजदारी गुन्हे दाखल करावे अशी मागणी होत आहे.
