जळगाव (प्रतिनिधी) जळगाव उपप्रादेशिक परिवहन कार्यालयाऐवजी आरटीओ अर्थात प्रादेशिक परिवहन कार्यालय २०२२ मध्ये मंजूर झाले होते. आकृतीबंध मंजूर केल्यानंतर आज शासनाने अध्यादेश काढत प्रादेशिक परिवहन कार्यालयात रुपांतर केले आहे.
शासनाने आज काढलेल्या अध्यादेशानुसार राज्यातील ९ उपप्रादेशिक परिवहन कार्यालयांचा दर्जा आता वाढला आहे. त्यात पिंपरी-चिंचवड, जळगाव, सोलापूर, अहमदनगर, वसई (जि. पालघर), चंद्रपूर, अकोला, बोरीवली (मुंबई) आणि सातारा येथील उप प्रादेशिक परिवहन कार्यालयांच्या दर्जामध्ये वाढ करुन प्रादेशिक परिवहन कार्यालयात रुपांतर करण्यास शासन निर्णयाद्वारे मान्यता देण्यात आली आहे.
जळगावला सध्या उपप्रादेशिक परिवहन कार्यालय आहे. ते धुळे प्रादेशिक परिवहन कार्यालयाच्या अखत्यारीत आहे. मात्र आता स्वतंत्र प्रादेशिक परिवहन कार्यालय होणार आहे. महसुली विभागाप्रमाणेच राज्यातील सहा विभागीय कार्यालयातील उपायुक्तांनादेखील सहआयुक्तांचा दर्जा देण्यात आला आहे.
दरम्यान, सप्टेंबर २०२२ मध्ये जळगाव उपप्रादेशिक परिवहन कार्यालयाऐवजी आता आरटीओ अर्थात प्रादेशिक परिवहन कार्यालय मंजूर केले होते. त्यांनतर मनुष्यबळ अर्थात कर्मचारी, अधिकारी नियुक्ती संदर्भात अभिप्राय शासनाने मागवले होते. त्यानुसार आता संबंधित प्रादेशिक परिवहन अधिकारी यांना उपरोक्त नमूद प्रादेशिक परिवहन कार्यालयांचे “कार्यालय प्रमुख” म्हणून घोषित करण्यात आले आहे. जळगाव जिल्हा मोठा व क्षेत्रफळही मोठे असल्याने चाळीसगावला उपप्रादेशिक परिवहन कार्यालयाची निर्मिती करण्याबाबतचा प्रस्ताव होता. मात्र, तो भडगावचा करण्यात होता.
शासनाच्या निर्णयाचे सर्वप्रथम मी स्वागत करतो. या निर्णयामुळे मोठ्या वाहन चालकांना वारंवार धुळे येथे छोट्या छोट्या कामासाठी जाण्याच्या त्रास यानिमित्ताने कमी होणार आहे. तसेच जळगाव कार्यालय प्रादेशिक कार्यालय झाल्यामुळे कर्मचारी, अधिकारी यांची संख्या वाढेल, पर्यायी नागरिकांची कामे लवकर होतील. जळगावकरांच्या दृष्टीने ही आनंदाची बाब असून आम्ही शासनाचे आभार मानतो.
– अॅड. जमील देशपांडे
(अध्यक्ष-जळगाव जिल्हा मोटर ड्रायव्हिंग स्कूल ओनर्स असोसिएशन,जळगाव)
