नवी दिल्ली (वृत्तसंस्था) देशात कोरोनाग्रस्तांच्या रुग्णसंख्येत चढउतार पाहायला मिळत आहेत. गेल्या २४ तासांत आदल्या दिवसाच्या तुलनेत नव्या कोरोना बाधितांच्या संख्येत जवळपास ६ हजारांनी वाढ झाली आहे. गेल्या २४ तासांत ३७ हजार ८७५ नवीन कोरोनाबाधित रुग्णांची नोंद झाली. तर ३६९ कोरोनाग्रस्तांना प्राण गमवावे लागले.
केंद्रीय आरोग्य मंत्रालयानं जारी केलेल्या आकडेवारीनुसार, देशात गेल्या २४ तासांत ३७ हजार ८७५ करोना रुग्ण आढळले असून ३६९ जणांचा मृत्यू झाला आहे. तसेच ३९ हजार ११४ जणांनी कोरोनावर मात केली आहे. नवीन बाधितांसह देशभरातील एकूण रुग्णसंख्या ३ कोटी ३० लाख ९६ हजार ७१८ झाली आहे. देशात सध्या ३ लाख ९१ हजार २५६ सक्रिय रुग्ण उपचाराधीन आहेत. आतापर्यंत ३ कोटी २२ लाख ६४ हजार ५१ जण कोरोनातून बरे झाले आहेत. तर, ४ लाख ४१ हजार ४११ जणांना कोरोनामुळे जीव गमवावा लागला आहे. दरम्यान गेल्या २४ तासांत केरळमध्येही पुन्हा रुग्णसंख्येत वाढ नोंदवण्यात आली आहे. देशात सापडलेल्या रुग्णसंख्येपैकी तब्बल २५ हजार ७७२ बाधित एकट्या केरळमधील असून १८९ जणांचा मृत्यू झाला आहे.
दरम्यान, गेल्या २४ तासांत ७८ लाख ४७ हजार ६२५ जणांना करोनाची लस देण्यात आली. राष्ट्रीय लसीकरण मोहिमेअंतर्गत आतापर्यंत ७० कोटी ७५ लाख ४३ हजार १८ जणांचं लसीकरण पूर्ण झालंय.
राज्यातील स्थिती
बुधवारी दिवसभरात ३ हजार ८९८ नवीन कोरोनाबाधित आढळले असून, ३ हजार ३ हजार ५८१ रूग्ण कोरोनातून बरे झाले आहेत. याशिवाय राज्यात ८६ कोरोनाबाधित रूग्णांचा मृत्यू झाल्याची देखील नोंद झाली आहे. राज्यात आतापर्यंत एकूण ६३,०४,३३६ कोरोनाबाधित रूग्ण बरे होऊन घरी परतले आहेत. यामुळे राज्यातील रूग्ण बरे होण्याचे प्रमाण (रिकव्हरी रेट) ९७.०८ टक्के एवढे झाले आहे. राज्यातील कोरोनाबाधित रूग्णांची एकूण संख्या ६४,९३,६९८ झाली आहे. राज्यात आजपर्यंत १३७८९७ कोरोनाबाधित रूग्णांचा मृत्यू झालेला आहे. सध्या राज्यातील मृत्यूदर २.१२ टक्के एवढा आहे.
