चाळीसगाव (प्रतिनिधी) – चाळीसगावच्या विकासात आणखी एक महत्त्वपूर्ण अध्याय जोडत आ. मंगेश चव्हाण यांच्या दूरदृष्टीपूर्ण नियोजनातून साकारलेल्या विविध विकासकामांचे लोकार्पण व भूमिपूजन २७ रोजी सायंकाळी ६ वाजता नवीन पंचायत समिती कार्यालयात उत्साहात व जल्लोषात पार पडले. या वेळी मान्यवरांनी आ. मंगेश चव्हाण यांच्या या विकासाच्या दूरदृष्टीचे कौतुक केले.
कार्यक्रमास जलसंपदा तथा आपत्ती व्यवस्थापन मंत्री गिरीष महाजन, पाणीपुरवठा व स्वच्छता मंत्री तथा पालकमंत्री गुलाबराव पाटील, प्रादेशिक विभाग नाशिकच्या वरिष्ठ अधिकारी अरुंधती शर्मा, जिल्हाधिकारी रोहन घुगे, जिल्हा परिषदेच्या मुख्य कार्यकारी अधिकारी करिश्मा नायर, अधीक्षक अभियंता राहुल पाटील, सहाय्यक जिल्हा निबंधक मंदार कुलकर्णी, प्रादेशिक परिवहन अधिकारी राजेंद्र वर्मा, कार्यकारी अभियंता कृष्णा आव्हाड, उपविभागीय अधिकारी प्रमोद हिले, ग्रामविकास विभागाचे उपसचिव प्रशांत पाटील, जिल्हा शल्यचिकित्सक डॉ. स्वप्निल सांगळे, सा. बां. विभागाचे कार्यकारी अभियंता एस. बी. सुपे, रणधीर सोमवंशी, प्रशांत पाटील यांच्यासह विविध विभागांचे अधिकारी व मान्यवर उपस्थित होते. कार्यक्रमानिमित्त बाजार समितीचे नवनिर्वाचित सभापती किशोर पाटील, उपसभापती राहुल पाटील, भाजपच्या नगराध्यक्षा प्रतिभा चव्हाण, उपनगराध्यक्षा हर्षल चौधरी, गटनेते प्रशांत कुमावत, भाजपचे नगरसेवक, माजी जिल्हा परिषद व पंचायत समितीचे पदाधिकारी, माजी सदस्य, भाजपचे पदाधिकारी व कार्यकर्ते तसेच नागरिक बहुसंख्येने उपस्थित होते. या कार्यक्रमाचे आयोजन भारतीय जनता पक्षाच्या चाळीसगाव शहर, सायगाव, मेहुणबारे व वाघळी मंडळ यांच्या वतीने करण्यात आले होते. तर चाळीसगावच्या विकासाची वारी, आनंदाची घरोघरी या संकल्पनेतून विकासाचा हा प्रवास पुढेही सुरू राहणार असल्याचे या वेळी सांगण्यात आले. तर नवीन शासकीय कार्यालये, अधिकारी व कर्मचाऱ्यांसाठी निवासस्थाने तसेच पाणीपुरवठा व आरोग्य सुविधांशी संबंधित प्रकल्पांमुळे नागरिकांना मोठा लाभ होणार आहे. या विकासकामांमुळे चाळीसगावच्या विकासाला आणखी गती मिळणार असल्याची भावना उपस्थितांनी या प्रसंगी व्यक्त केली.
या कामांचा आहे समावेश
या वेळी चाळीसगाव पंचायत समितीच्या नवीन प्रशासकीय इमारतीसह उपप्रादेशिक परिवहन कार्यालय, रायगड व्हीव्हीआयपी शासकीय विश्रामगृह, प्रांताधिकारी कार्यालय व प्रांताधिकारी तसेच तहसीलदार निवासस्थान, नोंदणी सेवा तीर्थ सह दुय्यम निबंधक कार्यालय, सार्वजनिक बांधकाम विभाग कर्मचाऱ्यांची निवासस्थाने, ग्रामीण रुग्णालय कर्मचाऱ्यांची निवासस्थाने तसेच नवीन टाकळी प्र.चा. पाणीपुरवठा योजना आदी विविध विकासकामांचे लोकार्पण व भूमिपूजन करण्यात आले. या विकासकामांमध्ये उपप्रादेशिक परिवहन कार्यालयासाठी ९.३९ कोटी रुपये, रायगड व्हीव्हीआयपी शासकीय विश्रामगृहासाठी ६.४ कोटी रुपये, प्रांताधिकारी कार्यालय व प्रांताधिकारी, तहसीलदारांच्या निवासस्थानासाठी १.६५ कोटी रुपये, तसेच इतर विविध विकासकामांसाठी कोट्यवधींचा निधी मिळाला आहे.
