नाशिक (वृत्तसंस्था) राज्यातील कोरोनाची परिस्थिती अत्यंत बिकट होऊ लागली आहे. मुंबई, पुणे, नागपूर, नाशिक या महत्त्वाच्या शहरात तर आकडेवारी चिंताजनक आहे. मृत्यूदरही वाढत आहे. दरम्यान नाशिकमध्ये नगरसेविका असणाऱ्या कल्पना पांडे यांचा कोरोनामुळे मृत्यू झाला आहे. पांडे या शिवसेनेच्या नगरसेविका होत्या.
नाशिक महापालिकेतील शिवसेनेच्या नगरसेविका कल्पना पांडे यांचे कोरोनामुळं निधन झाले आहे. कल्पना यांच्या निधनानं नाशिक शहरात हळहळ व्यक्त करण्यात येत आहे. कल्पना पांडे यांना काही दिवसांपूर्वी कोरोनाची लागण झाली होती. त्यांच्यावर नाशिकमधील एका खासगी रुग्णलयात उपचार सुरु होते. मात्र, आज उपचारादरम्यान त्यांची प्राणज्योत मालवली आहे. शिवसेनेच्या प्रभाग २४ मध्ये विद्यमान नगरसेविका म्हणून त्या काम पाहत होत्या. त्या नाशिक महापालिका निवडणुकीत चार वेळा निवडुन आल्या होत्या. त्यांना महापालिकेच्या कामकाजाचा दांडगा अनुभव होता. तसंच, प्रभागातील विकास कामे व मतदारांशी संपर्कही तगडा होता.
नाशिकमध्ये कोरोनाची दहशत कायम
नाशिक जिल्ह्यात शनिवारी दिवसभरात कोरोना बाधितांच्या संख्येत ४२९४ रुग्णांनी वाढ झाली आहे. हा आकडा मोठा आहे, वेळीच गांभीर्य न लक्षात घेतल्यास परिस्थिती हाताबाहेर जाऊ शकते. शनिवारी दिवसभरात नाशिकमध्ये ३१ जणांचा मृत्यू झाला असून अवघ्या तीन दिवसांत १०० जणांनी प्राण गमावले आहेत. त्यामुळे शनिवारपर्यंत बळींची संख्या २६५१ वर गेली आहे. एकट्या नाशिक शहरात शनिवारी दिवसभरात २०८७ नवीन कोरोनाबाधित रुग्ण आढळून आले होते. शहरात १० एप्रिल रोजी बळींची संख्या १५ होती.
