जळगाव (प्रतिनिधी) तालुक्यातील आसोदा गावातील सावता महाराज मंदीराजवळ दुचाकीचा कट लागल्यावरून तरूणाला चौघांकडून शिवीगाळ करत लोखंडी सळईने मारहाण करून जीवेठार मारण्याची धमकी दिल्याचा प्रकार शनिवार ५ ऑक्टोबर सकाळी ८ वाजता समोर आला आहे. याप्रकरणी रात्री ८ वाजता जळगाव तालुका पोलीस ठाण्यात चार जणांविरोधात गुन्हा दाखल करण्यात आला आहे.
किरण रविंद्र माळी (वय ३२ रा. आसोदा ता.जळगाव), हा तरूण आपल्या परिवारासह वास्तव्याला आहे. शनिवारी ५ ऑक्टोबर रोजी सकाळी ८ वाजता किरण माळी हा दुचाकीने जात असतांना त्याचा कट अविनाश रविंद्र माळी याला लागला. या कारणावरून अविनाश रविंद्र माळी, रविंद्र जनग माळी, प्रतिभा रविंद्र मोळी आणि करण रविंद्र माळी या चौघांनी शिवीगाळ करत मारहाण करण्यास सुरूवात केली. त्यानंतर एकाने लोखंडी सळई डोक्यात मारल्याने किरण माळी हा गंभीर जखमी झाला. तसेच जीवेठार मारण्याची धमकी दिली. हा प्रकार घडल्यानंतर किरण माळी यांनी जळगाव तालुका पोलीस ठाण्यात फिर्याद दिली. त्यानुसार पोलीस ठाण्यात मारहाण करणारे अविनाश रविंद्र माळी, रविंद्र जनग माळी, प्रतिभा रविंद्र मोळी आणि करण रविंद्र माळी यांच्या विरोधात गुन्हा दाखल करण्यात आला आहे. पुढील तपास पोहेकॉ सुधाकर शिंदे हे करीत आहे.
