जळगाव (प्रतिनिधी) शहरातील छत्रपती शिवाजी महाराज क्रीडा संकुलात असलेल्या जलतरण तलावात २२ वर्षीय फळविक्रेत्या तरुणाचा रविवारी सायंकाळी बुडून मृत्यू झाल्याप्रकरणी ठेकेदार,व्यवस्थापकासह चार जणांविरुद्ध आज जिल्हापेठ पोलिसात गुन्हा दाखल करण्यात आला आहे. सलमान शकील बागवान (वय २४, रा. जोशीपेठ, बागवान वाडा) असे मृत युवकाचे नाव आहे.
यासंदर्भात अधिक असे की, १८ जून रोजी जिल्हा क्रीडा संकुल समितीच्या जलतरण तलावात २३ वर्षीय तरुण सलमान शकील बागवान याचा पाण्यात बुडून मृत्यू झाला होता. याप्रकरणी आज दि. २२ जून रोजी जिल्हापेठ पोलीस स्थानकात भारतीय दंड विधान कायदा ३०४ अ प्रमाणे फैजल जावेद बागवान यांनी दिलेल्या फिर्यादीवरून जलतरण तलावाचे व्यवस्थापक राहुल विजय सुर्यवंशी, जीवरक्षक सुनील चौधरी, यादव महाले आणि पंकज पवार यांच्याविरोधात जळगाव जिल्हापेठ पोलिसात गुन्हा दाखल करण्यात आला.
दरम्यान, जिल्हा क्रीडा संकुल समितीच्या या जलतरण तलावात आतापावेतो तीन तरुण मृत्युमुखी पडले असून भविष्यात अशा प्रकारची पुनरावृत्ती होऊ नये म्हणून जिल्हा जलतरण संघटनेचे सचिव फारुख शेख यांनी जिल्हाधिकारी ,आयुक्त क्रीडा व युवा सेवा संचालनालय, पुणे, क्रीडा मंत्री गिरीश महाजन यांना ९ मुद्द्यांबाबत तक्रार सादर केली आहे. त्या तक्रारीच्या अनुषंगाने या सदोष मनुष्यवधात जिल्हा क्रीडा अधिकारी कार्यालयाचे संबंधित अधिकारी व कर्मचारी यांची सुध्दा चौकशी होणे आवश्यक आहे. कारण क्रीडा कार्यालयाने वेळीच आपली कामगिरी पार न पाडल्याने हा तिसरा तरुण मयत झाला आहे. त्यामुळे प्रशासकीय अधिकारी व कर्मचाऱ्यांची सुद्धा चौकशी होऊन त्यांच्या विरोधात गुन्हा दाखल करून विभागीय चौकशी होणे आवश्यक असल्याची मागणी फारूक शेख यांनी केलेली आहे. दरम्यान, पुढील तपास सहाय्यक पोलीस निरीक्षक मीरा देशमुख या करीत आहे.
