पहूर, ता. जामनेर (प्रतिनिधी) जांभूळ ता. जामनेर येथील कैलास विठोबा वडाळे यांच्या मर्डर मिस्ट्रीत फिल्मी स्टाईल टर्न आणि ट्वीस्ट सुरूच आहेत. संशयित आरोपी रमेश संपत मोरे (वय ५६) याने खून केल्याची कबुली पोलिसांना दिल्यानंतर गुन्ह्याची संपूर्ण उकल झाल्याचे वाटले. परंतू मोरे याने पोलिसांना खुनाचे कारण न सांगितल्यामुळे तपासात नवीन टर्न आला. एवढेच नव्हे तर, ज्या ठिकाणी मृतदेहाची विल्हेवाट लावल्याचे पोलिसांना सांगितले, तो परिसरही पोलिसांनी पिंजून काढल्यानंतरही मृतदेह आढळून न आल्यामुळे या प्रकरणात आता पुन्हा नवीन ट्वीस्ट आलाय. मृतदेह सापडत नसल्यामुळे या मर्डर मिस्ट्रीत दृश्यम चित्रपटाप्रमाणे टर्न आणि ट्वीस्ट सुरु आहेत.
नेमकं काय घडलं !
जामनेर तालुक्यातील जांभूळ येथील रहिवासी कैलास विठोबा वडाळे १३ मे रोजी दुपारी ३ वाजेपासून बेपत्ता झाले होते. परिवारातील लोकांनी सर्वत्र शोध घेतल्यानंतरही त्यांचा थांगपत्ता लागला नव्हता. त्यामुळे मुलगा अविनाशने १४ मे रोजी पहूर पोलीस स्टेशनमध्ये वडील कैलास वडाळे बेपत्ता झाल्याची तक्रार दिली. पहूर पोलिसांनी सर्वत्र शोध घेतला परंतू त्यांचा कुठंही शोध लागला नाही. एक-एक करीत महिना उलटून गेला. पण कुठलीच माहिती हाती लगत नव्हती. शेवटी कैलास वडाळे यांच्या कुटुंबियांनी काही दिवसांपूर्वी पोलीस अधीक्षक एम. राजकुमार यांची भेट घेतली आणि सर्व हकीगत सांगितली. पोलीस अधीक्षकांनी घटनेचे गांभीर्य लक्षात घेत याबाबतचा तपास स्थानिक गुन्हे शाखेला करण्याचे आदेश दिले. यानंतर स्थानिक गुन्हे शाखेचे वरिष्ठ पोलीस निरिक्षक किसन नजन पाटील यांनी कर्मचाऱ्यांचे पथक कामाला लावले आणि अवघ्या काही तासात वडाळे यांचा मित्र रमेश मोरे याल ताब्यात घेतले.
मित्र रमेश मोरेला अटक !
स्थानिक गुन्हे शाखेच्या पथकाने तपासचक्र फिरवायला सुरुवात केली. त्यानुसार गावातून माहिती मिळाली की, कैलास वडाळे यांची रमेश संपत मोरे यांच्यासोबत घट्ट मैत्री होती. परंतू मित्र बेपत्ता झाल्यानंतरही रमेश याने कधीही कैलास यांच्या परिवाराशी संपर्क केला नाही. अगदी कुटुंबाकडे साधी विचारपूससुद्धा केली नव्हती. तसेच मयत कैलास यांच्यासोबत शेवटी त्यालाच बघण्यात आले, असल्याची माहिती मिळताच स्थानिक गुन्हे शाखेला तपासाचा धागा सापडला. यानंतर दोनच दिवसात २० जूनला स्थानिक गुन्हे शाखेने रमेश मोरे याला अटक केली. त्याची कसून चौकशी केल्यावर त्याने कैलास वडाळे यांचा खून केल्याची कबुली दिली. दि. १३ मे रोजी रमेश आणि कैलास हे दोघेही जांभूळ येथे रस्त्यालगत दारु पीत होते. त्यानंतर त्याने दगड आणि कुऱ्हाडीच्या मदतीने हत्या केली. आणि नंतर मृतदेहाची विल्हेवाट लावली., अशी कबुली दि. २१ जून रोजी पोलिसांना दिली. मात्र मृतदेहाची विल्हेवाट कुठे लावली, हे अद्यापही त्याने पोलिसांना समजू दिले नाही. या प्रकरणात आणखीही संशयितांची चौकशी सुरु असल्याचे कळते.
तोरनाळा जंगलात मृतदेहाचा शोध !
रमेश मोरे याने खुनाची कबुली दिल्यानंतर पोलिसांना घटनास्थळ दाखवले. पोलिसांना घटनास्थळी मयताचे कपडे, मोबाईल व इतर वस्तू सापडल्या. मात्र कैलास वडाळे यांचा मृतदेह मिळाला नाही. त्यामुळे कैलास वडाळे यांचा मृतदेह शोधण्यासाठी एलसीबी पथक व पहूर पोलीसांनी रमेशला दिवसभर घेऊन घटनास्थळ शोधले. त्याने तोरनाळा ता. जामनेर येथे मृतदेहाची विल्हेवाट लावल्याचे पोलिसांना सांगितले. त्याप्रमाणे रात्री पोलिसांनी तोरनाळा जंगल पिंजून काढला. पण मृतदेह आढळला नाही. त्यामुळे रमेश पोलिसांची दिशाभूल करत असल्याचे समोर येत आहेत.
