जळगाव (प्रतिनिधी) बसमध्ये चढतांना महिलेच्या पर्समधून अज्ञात चोरट्यांनी ६५ हजार रुपये किंमतीचे सोळा ग्रॅम वजनाचे सोन्याचे दागिने चोरुन नेले. ही घटना दि. १८ मे रोजी दुपारच्या सुमारास नवीन बसस्थानकात घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
यावल तालुक्यातील किनगाव बु. येथील शुभांगी सचिन बिऱ्हाडे या पतीसह अहमदनगर येथे वास्तव्यास आहे. त्यांचे पती कंपनीत नोकरी करतात. त्यांच्या मुलांना शाळेला सुट्टी असल्याने दि. १८ मे रोजी विवाहिता शुभांगी बिऱ्हाडे या त्यांचे सासरे दिनकर बिऱ्हाडे व सासू मालतीबाई बिऱ्हाडे यांना घेवून किनगाव येथे सासरी जाण्यासाठी नवीन बस स्थानकात आले. पावणे चार वाजेच्या सुमारास यावल जाणारी (एमएच २०, बीएल १५९६) क्रमांकाची बस आल्यानंतर त्या बसमध्ये चढल्या. यावेळी शुभांगी बिऱ्हाडे यांनी त्यांच्याजवळ असलेली पर्स बघितली असता, त्यांना त्यामध्ये ठेवलेले पाऊच दिसून आले नाही.
शुभांगी यांनी त्यामध्ये त्यांची दहा ग्रॅम वजनाची दोन अंगठ्या, ५ ग्रॅमचे सोन्याचे कानातले, एक ग्रॅमची जुती व अर्धा ग्रॅमचा तार असा एकणू ३५ हजार रुपयांचा सुमारे १६ ग्रॅम सोन्याचे दागिने चोरीस गेल्याचे समजले. गर्दीचा फायदा घेत चोरट्याने त्यांच्याकडील सोन्याचे दागिने चोरल्याचे लक्षात येताच त्यांनी दि. १९ रोजी जिल्हापेठ पोलिसात तक्रार दिली. त्यांच्या तक्रारीवरुन अज्ञात चोरट्याविरुद्ध गुन्हा दाखल करण्यात आला आहे. पुढील तपास पोहेकॉ जुबेर तडवी करीत आहे.
