छत्रपती संभाजीनगर (वृत्तसंस्था) भरधाव जाणाऱ्या ट्रकने सायकलीवर नातवासह जाणाऱ्या आजोबाला उडवल्याने झालेल्या अपघातात आजोबांचा जागीच मृत्यू झाला तर ५ वर्षीय नातू गंभीर जखमी झाला आहे. ही घटना धुळे- सोलापूर महामार्गावर माळीवाडा गावाजवळ एका कारखान्यासमोर रविवारी दुपारी एक वाजेच्या सुमारास घडली. पुंडलिकराव रंभाजी ढंगारे (वय ७५ वर्षे, रा. माळीवाडा, जि. छत्रपती संभाजीनगर) असे मयताचे नाव
रविवारी सोलापूर-धुळे महामार्गावर सार्क केमिकल्ससमोर ट्रक क्र. (पी.बी.०८ ई क्यू ३५२९) हा संभाजीनगरहून कन्नडकडे जात होता. यावेळी माळीवाडाजवळील येथील उड्डाणपूलाहून खाली उतरून जात असताना पुंडलीकराव ढंगारे हे सायकलवरून आपल्या नातवाला घेऊन शेतात जात होते. याचवेळी ट्रकने सायकलला समोरून जोरदार धडक दिली.
या अपघातात पुंडलीकराव यांच्या डोक्याला जबर मार लागल्यामुळे त्यांचा जागेवरच मृत्यू झाला तर नातू ओजस नंदकिशोर ढंगारे (५) हा गंभीर जखमी झाला. पुंडलिकराव व ओजस यांना रुग्णवाहिकेद्वारे छत्रपती संभाजीनगर येथील घाटीत दाखल करण्यात आले. परंतू वैद्यकीय अधिकाऱ्यांनी पुंडलिकराव यांना तपासून मयत घोषित केले तर ओजसवर उपचार सुरू केले आहेत. या घटनेची दौलताबाद पोलिस ठाण्यात नोंद करण्यात आली आहे. या घटनेचा अधिक तपास पोलिस करीत आहेत.
