धरणगाव (प्रतिनिधी) जळगाव जिल्ह्यातील माध्यमिक शिक्षकांचा माहे डिसेंबर २०२१ चा पगार आज २० जानेवारी येऊन ही अद्याप झालेला नसून जिल्ह्यात ३९१ शाळांचे पगार नाही.
या संदर्भात माहिती घेतली असता कोषागार कार्यालयात वेतन बाबत प्रक्रिया पूर्ण झालेली आहे शिवाय अनुदान देखील उपलब्ध असल्याचे समजते. मात्र शिक्षण संचालक पुणे यांच्याकडून शाईचे पत्र आल्याशिवाय पुढील कार्यवाही होत नाही. जानेवारी महिन्याचे शेवटचे दहा दिवस बाकी असून अद्याप पगार झालेले नाहीत. या शाईचे पत्र प्रवासात शिक्षकांचे पगार रखडले आहेत.
यापूर्वी एक तारखेला पगार होतील अशी अनेकदा वल्गना झालेली आहे. संघटनांना शासनाने शब्द दिलेला आहे उशिरा पगार झाल्याने शिक्षक, शिक्षकेतर कर्मचाऱ्यांना आर्थिक अडचणीना तोंड द्यावे लागते. उशिरा वेतन मिळाल्याने पतसंस्थांच्या अधिकच्या व्याजाचा बोजा कर्मचारी वर्गाला सहन करावा लागत आहे. एकीकडे शासनाने गतिमान प्रशासनावर भर दिलेला आहे. मात्र वेतनासाठी आवश्यक असणाऱ्या शाईची प्रत पुणे ते जळगाव प्रवास विलंबाने करते यासाठी जबाबदार कुणाला धरावे?, असा प्रश्न शिक्षकांना पडलेला आहे. वेतनाची बिले शाळांमधून वेतन पथक, वेतन पथकातून ट्रेझरी, ट्रेझरी मधून पुन्हा वेतन पथक, वेतन पथकातून जिल्हा बँक आणि जिल्हा बँकेतून शाखा निहाय रवाना होत असतात. एव्हढ्या दिव्य प्रवासात पुन्हा शाईची अडचण आलेली आहे. यामुळे शिक्षक वर्गामध्ये तीव्र नाराजी व्यक्त होत आहे. यापूर्वी शाई बाबत फारसे कुणाला माहीत देखील नव्हते मात्र आताच शाई चा प्रवास असा लांबणीवर का पडायला लागला? असा प्रश्न उपस्थित होत आहे.
या संदर्भात वेतन पथकचे अधीक्षक शर्मा यांच्याशी संपर्क केला असता, अनुदान रिलीज ऑर्डरचे मूळ स्वाक्षरी असलेले पत्र कोषागार कार्यालयाला प्राप्त झाल्यशिवाय कोषागार अधिकारी बिले पास करीत नाही. आज सदर पत्र घेवून कर्मचारी पुण्याहून निघालेला आहे. उद्या कोषागार कार्यालयात जमा होईल त्यानंतर बिले पास होतील. हा सर्व प्रक्रियेचा भाग आहे यात कुणीही काहीही करू शकत नाही. असे सांगण्यात आले.
शिक्षक शिक्षकेतर कर्मचारी वर्गाचे पगार वेळेवर व्हावेत यासाठी आवश्यक ती पूर्तता वेळीच करावी, अशी मागणी तालुक्यातील शिक्षक शिक्षकेतर कर्मचारी संघटनांच्या वतीने करण्यात आली आहे. यासंदर्भात शिक्षक आमदार सुधीर तांबे यांच्याशी भ्रमणध्वनीवरून संपर्क केला असता म्हणाले की, शाळेचे पत्र आज प्राप्त झाले असून येत्या सोमवार पर्यंत शिक्षकांचा पगार होईल असे सांगितले.
ऑनलाईन पद्धतीने पगार जमा व्हावेत यासाठी अंमलबजावणी करण्यात येणार – सुधीर तांबे
जळगाव जिल्ह्यातील माध्यमिक शिक्षकांचे पगार झालेले नसून येत्या सोमवार पर्यंत पगार होतील असे वेतन अधीक्षक यांनी सांगितले.
लवकरच शिक्षकांच्या खात्यावर पगार जमा होतील वारंवार त्यांच्याशी बोलून लवकरच पगार जमा करण्यात येणार आहेत. एक तारखेला ऑनलाईन पद्धतीने पगार जमा व्हावेत यासाठी लवकरात लवकर अंमलबजावणी करण्यात येणार आहे, असे नाशिक पदवीधर शिक्षक आमदार सुधीर तांबे यांनी सांगितले.
प्रत उशिरा प्राप्त झाल्याने पगाराला उशीर – एम.एच.चौधरी
या महिन्याच्या पगारासाठी लागणारे अनुदान आतापर्यंत उपलब्ध नव्हते. त्यातल्या त्यात आॅनलाईन प्रणालीमुळे शिक्षण संचालकांची स्वाक्षरी असलेली प्रत मिळणे आवश्यक असते. नेमकी तिच प्रत उशिरा प्राप्त झाल्याने पगाराला उशीर होत आहे. असं विद्या समितीच्या सचिव एम.एच.चौधरी यांनी सांगितले.
शासनाच्या धोरणानुसार आणि संघटनांना दिलेल्या आश्वासनानुसार प्रत्येक महिन्याच्या एक तारखेला वेतन अदा होणे अपेक्षित आहे, मात्र प्रशासकीय दिरंगाईमुळे वेतन उशीरा होते. कधी अनुदान तर कधी शाईची प्रत अशी वेगवेगळी कारणे अधिकारी देत असतात. यामुळे शिक्षकांना आर्थिक भुर्दंड सोसावा लागतो. पंधरा तारखेनंतर वेतन झाल्यास सर्व कर्जदार शिक्षक शिक्षकेतर यांना पतसंस्था अथवा बॅकेचे अतिरिक्त व्याज भरावे लागते आहे.
डॉ. संजीवकुमार सोनवणे (मुख्याध्यापक, पी. आर. हायस्कूल, धरणगाव)
