जळगाव (प्रतिनिधी) तब्बल ९ गंभीर स्वरूपाचे गुन्हे दाखल असलेल्या सराईत गुन्हेगाराने हद्दपारीचे आदेश काढल्याच्या रागातून त्या गुन्हेगाराने थेट उपविभागीय दंडाधिकाऱ्यांना शुक्रवारी सायंकाळी फोनवरुन धमकी दिली. एवढेच नव्हे तर, चक्क घर गाठत जाब देखील विचारला. याप्रकरणी प्रांतधिकाऱ्यांनी रामानंद नगर पोलीस ठाण्यात तक्रार दिली आहे.
पोलीस ठाण्यात ९ गंभीर गुन्हे दाखल असलेला सराईत गुन्हेगार भूषण रघुनाथ सपकाळे (वय ३२, रा. खेडी खुर्द, ता. जळगाव) याच्या हद्दपारीचा प्रस्ताव तालुका पोलीस ठाण्याचे तत्कालीन पोलीस निरिक्षक रामकृष्ण कुंभार यांनी पोलीस अधिक्षकांकडे सादर केला होता. चौकशीअंती भुषण सपकाळे याला २ वर्षासाठी जिल्ह्यातून हद्दपार करण्याचे आदेश पारित करण्यात आले होते. या हद्दपारीच्या प्रस्तावाचे कामकाज स्थानिक गुन्हे शाखेचे वरिष्ठ पोलीस निरीक्षक किसन नजन पाटील यांनी पाहिले होते.
दरम्यान, कारवाईची माहिती मिळाल्यानंतर भूषण सपकाळे याने सायंकाळी थेट उपविभागीय दंडाधिकारी महेश सुधाळकर यांना फोन केला.
फोनवरुन माहिती न दिल्याने हद्दपार केलेल्या भूषण सपकाळे हा थेट एका सहकाऱ्यासोबत त्यांच्या शासकीय निवासस्थानी पोहचला. त्याने शिपायाला बाजूला सारत महेश सुधाळकर यांना कारवाईबाबत जाब विचारून तुमच्या घराचा दरवाजा उघडा ठेवा, मी परत येईल अशी धमकी देवून तो तेथून पसार झाला. ही घटना शुक्रवारी सायंकाळच्या सुमारास घडली.
घटनेची माहिती उपविभागीय दंडाधिकाऱ्यांनी जिल्हाधिकाऱ्यांना दिली. जिल्हाधिकाऱ्यांनी पोलीस अधीक्षकांना घटनेबाबत माहिती दिल्यानंतर अवघ्या काही वेळातच पोलीस उपअधीक्षक संदीप गावित यांनी प्रांतधिकाऱ्यांचे घर गाठून घटनेची माहिती जाणून घेतली. त्यानंतर पोलिसांनी भूषणचा शोध घेत त्याची धुळे कारागृहात रवानगी करण्यात आली.
