मुंबई (वृत्तसंस्था) राष्ट्रवादी काँग्रेसचे नेते एकनाथराव खडसे यांच्या अडचणी वाढण्याची शक्यता आहे. भोसरी भूखंड खरेदी गैरव्यवहार प्रकरणी सक्तवसुली संचालनालय (ईडी) आठवडाभरात आरोपपत्र दाखल करणार असल्याचे समजते.
राष्ट्रवादी काँग्रेसचे नेते एकनाथ खडसे यांची सुमारे पावणे सहा कोटी रुपयांची मालमत्ता ईडीने जप्त केली. त्याचप्रमाणे एक बँक खाते गोठवलं. त्यात ८६ लाख रुपये आहेत. मनी लाँडरिंग कायद्यानुसार ईडीच्या अधिकाऱ्यांनी ही कारवाई केली. एकनाथ खडसे हे राष्ट्रवादी काँग्रेसचे वरिष्ठ नेते आहेत. त्यांच्याविरोधात ईडीने मनी लाँडरिंगचा गुन्हा दाखल केला आहे. या गुन्ह्याच्या तपासात आतापर्यंतची ही मोठी कारवाई आहे. ईडीच्या अधिकाऱ्यांनी शुक्रवारी २७ ऑगस्ट रोजी एकनाथ खडसे यांची ५ कोटी ७३ लाख रुपयांची मालमत्ता जप्त केली.
याप्रकरणी दाखल मनी लॉन्ड्रिंगच्या गुन्ह्यात ईडीने त्यांचे जावई गिरीश चौधरी याला ७ जुलैला अटक केली आहे. खडसे यांची दीड महिन्यापूर्वी चौकशी केली आहे. त्यांची पत्नी मंदाकिनी खडसे आणि जावई यांनी हा भूखंड संयुक्तपणे खरेदी केला आहे. त्यासाठी एकनाथ खडसे यांनी आपल्या पदाचा गैरवापर करून हा व्यवहार केल्याचा आरोप आहे. मंदाकिनी खडसे यांना दोनदा समाज बजावले आहे. मात्र त्यांनी वैद्यकीय कारणास्तव आतापर्यंत चौकशीला हजर राहणे टाळले आहे.
