लातूर (वृत्तसंस्था) मागील प्रकरणाची कुरापत काढून गुरुवारी (दि. १७) सकाळच्या प्रहरीच एका ३७ वर्षीय तरुणाचा कोयत्याने गळा चिरुन खून केल्याची घटना घडली आहे. धक्कादायक म्हणजे शिवाजी नगर पोलीस ठाण्यापासून हाकेच्या अंतरावर असलेल्या दयानंद गेट समोरील जुन्या रेल्वे लाईनवर ही घटना घडली. शिवाजी उर्फ अनिल देवकर (रा. बाबा नगर, खाडगाव रोड), असे खून झालेल्या व्यक्तीचे नाव आहे.
आरोपी कृष्णा सुनील मुद्दे व मयत शिवाजी उर्फ अनिल देवकर (दोघेही रा. बाबा नगर, खाडगाव रोड) हे दोघे मावसभाऊ होते शिवाय ते चारचाकी कार भाड्याने देण्याचा व्यवसाय होता. १० दिवसांपूर्वी या दोघांमध्ये किरकोळ बाचाबाची झाली होती. त्यानंतर नेहमीप्रमाणे चारचाकी कार पार्कीगच्या ठिकाणी गुरुवारी सकाळी ते आले होते. मात्र, मागील प्रकरणाचा राग मनात धरुन कृष्णा सुनील मुद्दे, पद्मिनी सुनील मुद्दे यांनी कट रचून शिवाजी उर्फ अनिल देवकर याचा काटा काढण्याचे ठरिवले होते. दयानंद गेट समोरील जुनी रेल्वेलाईनवरील तोडकर एजन्सीसमोर आरोपीने शिवाजी उर्फ अनिल देवकर यांच्या मानेवर, छातीवर आणि हातावर सपासप वार केले. यामध्ये त्याचा जागीच मृत्यू झाला.
अवघ्या काही क्षणात शिवाजी उर्फ अनिल देवकर हा रक्ताच्या थारोळ्यात माखला होता. भर रस्त्यावर ही घटना घडल्याने नागरिकांची मोठी गर्दी झाली होती. घटनेची माहिती मिळताच मयत शिवाजी उर्फ अनिल देवकर यांची आई घटनास्थळी दाखल झाली होती. मुलगा रक्ताने माखलेला पाहून त्यांनीही टाहो फोडला. शिवाजी नगर पोलीस ठाण्याच्या कर्मचाऱ्यांनी घटनास्थळी दाखल होत शवविच्छेदनासाठी मृतदेह हा शासकीय वैद्यकीय महाविद्यालयात नेला होता. मयताची आई विमल त्र्यंबक देवकर (रा. बाबा नगर खाडगाव रोड लातूर) यांच्या फिर्यादीवरुन सीआर ४२३/२०२४ कलम १०३ (१),६१ (२) बीएनएस ४,२५ अन्वेय शिवाजी नगर पोलीस ठाण्यात गुन्हा नोंद करण्यात आला आहे. पोलीस निरीक्षक दिलीप सागर यांच्या मार्गदर्शनाखाली पोलीस उपनिरीक्षक टी.व्ही. पाटील हे तपास करीत आहेत.
या घटनेमधील आरोपी कृष्णा सुनील मुद्दे व मयत शिवाजी उर्फ अनिल देवकर हे मावसभाऊ तर होतेच पण राहण्याचे आणि व्यवसायाचेही ठिकाण एकच होते. चारचाकी कार भाड्याने देण्याचा त्यांचा व्यवसाय आणि पार्कीग ही दयानंद गेट समोरील जुनी रेल्वे लाईन परिसरात होती. काही दिवसांपूर्वी एका प्रकारावरुन त्यांच्यामध्ये भांडण झाले होते. त्यानंतर आरोपी कृष्णा सुनील मुद्दे हा व्यवसयाच्या ठिकाणी फिरकलाच नव्हता. गुरुवारी सकाळी जुनी रेल्वे लाईन येथे शिवाजीला पाहताच त्याने व इतर तिघांनी शिवाजीचा खून केला. त्यामुळे घटनेमागचे सत्य काय? याचा शोध पोलिसांना घ्यावा लागणार आहे.
